Kryeministri Edi Rama ka njoftuar në rrjetet sociale se Rilindja Urbane ka mbërritur në Derviçan, qendrën e bashkisë së Dropullit, e njohur si një zonë minoritare.
“Kantieri i Rilindjes Urbane në zemër të Derviçanit, qendrës së bashkisë së Dropullit, e cila do të mbajë emrin e Konstandinos Mitsotakis, kryeministrit të parë grek që vizitoi minoritetin pas rënies së komunizmit”, shkruan Rama.
Kostandinos Mitsotakis është babai i kryeministrit aktual të Greqisë, me të cilin Edi Rama ka raporte pothuajse të ngrira për shkak të arrestimit të kryebashkiakut të zgjedhur të Himarës, Fredi Beleri.
Ky i fundit ndodhet në paraburgim, duke mos iu dhënë mundësia për të marrë zyrtarisht detyrën, ndërsa Athina zyrtare ka paralajmëruar se Shqipëria rrezikon rrugën e integrimit në BE.
Sigurisht që ky shesh në Derviçan, që do të mbajë emrin e ish-Kryeministrit të Greqisë, mund të jetë një moment i mirë, për organizimin e një ceremonie, ku Rama mund të ftojë djalin e Kostandinos, që është Kryeministri aktual i vendit fqinj, dhe me këtë rast mund të zhvillojnë edhe një takim dypalësh, i munguar prej kohësh mes dy kryeministrave.
Gjithsesi edhe më herët, gjatë fushatës për zgjedhjet e 14 majit, Rama është shprehur me superlativa për Kostandinos Mitsotakis, babain e kryeministrit Kyriakos Mitsotakis.
Në postimin e Ramës në rrjet ka një seri reagimesh të ndjekësve të tij që nuk e përkrahin idenë se sheshi do të marrë emrin e ish-Kryeministrit të Greqisë.
Nuk dihet nëse me një veprim të tillë, Kryeministri po përpiqet të zbusë deri diku inatin e Athinës zyrtare për arrestimin e Belerit, duke i ofruar emrin e një sheshi, pavarësisht se sa i madh ose i vogël do të jetë.
Discussion about this post