Nuk janë të pakët emrat që i kanë dhënë zë Shqipërisë, me arritjet e tyre në fusha të ndryshme. I tillë është dhe i riu, Stivi Sterjo i cili punon për kompaninë Google në Gjermani si drejtues i analitikës.
Në emisionin “Jeta pa filtër” me autore psikologen Ervisa Lula, Sterjo, tregon si u rekrutua nga një prej kompanive më të mëdha në botë dhe si e përjetoi këtë ngjarje suksesi në karrierën e tij.
“Ka qenë ëndrra ime të punoja për Google, kisha aplikuar një vit e gjysmë më parë dhe nuk më kishin pranuar, u mërzita shumë, por vazhdova dhe gjeta punë tjetër. Një vit më vonë kur nuk e prisja fare më kontaktuan vetë. Ishte një gëzim shumë i madh”.
Përveç teknologjisë një nga pasionet e Stivit janë udhëtimet. Ai flet për disa nga udhëtimet e tij më të bukura që kanë qenë ato në Afrikë dhe Amerikën e Jugut. Për të dita fillon në orën 5 e gjysmë të mëngjesit me meditim, yoga dhe lexim.
Ai ka folur dhe për të rinjtë shqiptarë të cilët e shohin jetën me pesimizëm ku i lë një mesazh: “Përpiquni të bëni sa më shumë me ato që keni, shikoni brenda vetes çfarë mund të bëni më mirë, si mund ta realizoni atë, mos u ankoni për rrethanat, nuk e ka fajin asnjë njeri fatin tuaj e keni në dorë vet.”
Discussion about this post