Një shqiptare fiton konkursin e modës në Greqi

Një e re me origjinë shqiptare është zgjedhur si modelja më e mirë në Greqi.

Mbrëmjen e së premtes u zhvillua finalja e GNTM5 dhe Alexia Traiko doli fituese e konkursit të madh modës.

Modelja 19-vjeçare nga Selaniku, me origjinë nga Shqipëria, bëri përshtypje që në momentin e parë kur hyri në reality show, duke arritur të fitojë titullin e Greece’s Next Top Model.

Modelja e re fitoi edhe çmimin e rëndësishëm prej 50 mijë eurosh, kontratë njëvjeçare me Dust and Cream, bursë dyvjeçare për të studiuar çdo specialitet që dëshiron në IEK, bizhuteri me vlerë 20 mijë euro nga kompania Georg Jensen dhe një makinë Citroen Ami.

Kush është Alexia Traiko?

Alexia Traiko është nga Shqipëria, por është rritur në Selanik, ku edhe jeton.

Edhe pse 19-vjeçare, e reja ka arritur të ketë tre vite përvojë profesionale në fushën e modës, pasi ka rezervuar shumë punë të rëndësishme, nga sesionet fotografike e deri te pasarelat.

Pavarësisht pasionit për modelingun, siç është shprehur ajo, i pëlqen edhe kërcimi, me të cilin merret që në moshë shumë të vogël.

Motoja e saj është “Ajo që nuk të vret të bën më të fortë” dhe fituesja e re e konkursit të modelingut televiziv dëshiron gjithmonë të përpiqet për rezultatin më të mirë të mundshëm në jetën e saj.

“E kam nisur shumë rastësisht modelingun. Kur jam para kamerës ndihem e fortë, ndihem ndryshe, ndihem sikur nuk jam Alexia klasike dhe po marr një formë tjetër”, theksoi fituesja e GNTM.