Pas Edvin Kondilit dhe Adnan Xholit një tjetër prokuror ka shprehur interes për të qenë drejtues i Prokurorisë së Posaçme dhe krimit të Organizuar (SPAK). Prokurori Altin Dumani ka dorëzuar ditën e sotme kërkesën për të kandiduar si kreu i SPAK, për të zëvendësuar në këtë detyrë Arben Krajën.
Më herët, ishte prokurori Edvin Kondili që depozitoi kërkesën dhe shprehu interesin për të qenë drejtuesi i Prokurorisë së Posaçme kundër Korrupsionit dhe Krimit të Organizuar. Kondili ka qenë prokuror i Krimeve të Rënda dhe e kaloi me sukses Vettingun në 7 qershor të vitit 2019. Prokurori që hetoi trafikun e 613 kilogramë kokainë që u kapën në një kontenier me banane në portin e Durrësit, rezultoi se nuk kishte probleme me pasurinë, pastërtinë e figurës apo aftësitë profesionale.
Kondili ka qenë edhe një nga tre kandidatët në garën e parë për kreun e SPAK-ut, ku garoi me drejtuesin aktual Arben Kraja dhe prokurorin Altin Dumani. Asokohe ai ishte i vetmi që nuk kishte mbajtur asnjëherë poste drejtuese në organin e akuzës.
Kujtojmë se disa ditë më parë, interesin për të drejtuar Prokurorinë e Posaçme kundër Korrupsionit dhe Krimit të Organizuar e shprehu edhe prokurori Adnan Xholi, duke e çuar në tre numrin e prokurorëve të interesuar.
Discussion about this post