U afruan në Madrid te Reali për të qenë e ardhmja e “Los Blancos”, por Federiko Valverde, Rodrigo Goesh dhe Vinicius Zhunior janë e tashmja dhe e ardhmja e Realit njëkohësisht. Golat dhe asistet e tyre në fitoren 5-1 kundër Sëlltikut ishin vetëm një dëshmi më shumë për të garantuar të gjithë se në këtë sezon ata kanë shpërthyer plotësisht duke marrë për dore as më shumë e as më pak, por Realin e Madridit!
Me Karim Benzema, që më shumë ka qenë jashtë fushe se në fushë në këtë pjesë të parë të sezonit – francezi ka humbur 7 takime deri më tani mes kampionatit spanjoll dhe Ligës së Kampioneve – është kjo treshe që po udhëheq skuadrën e Ançelotit.Janë shifrat që tregojnë se treshja amerikanojugore e përbërë nga dy brazilianë dhe një uruguaian kanë marrë pjesë në 40 nga 46 golat e shënuar nga Madridi në këtë sezon.
Vinicius Zhunior mbetet lojtari me shifrat më të mira, teksa numëron 10 gola dhe 5 pasime për gol. Nga ana tjetër ai është lojtari me minutazhin më të lartë në sezon me 1578 minuta aktivizim. Pas tij vjen Fede Valverde, me mesfushorin nga Uruguai që ka marrë pjesë në 13 gola, me 8 rrjeta dhe 5 pasime për gol. Lista mbyllet me Rodrigon me 7 gola dhe 5 asiste.
QETËSIA – Pa dyshim, shifrat e Viniciusit, Valverdes e Rodrigos janë lajmi më pozitiv për trajnerin Ançeloti, por dhe për presidentin Florentino Perez.
Prej kohësh ai po kërkon të gjejë në qarkullim pasuesin e Karim Benzemasë. U duk se do të ishte Mbape, por me francezin që zgjodhi të qëndronte në Paris, Parezit i është dashur t’ia nisë nga e para kërkimet për njeriun e duhur “post Benzema”.
Me formën që po kalon treshja e pagëzuar si “VRV”, Perezit dhe Ançelotit sikur i është hequr një barrë. Ata që duhej të ishin pasuesit real të Benzemasë, Joviç, Mariano Diaz apo Eden Hazard, të gjithë kanë qenë një dështim. Për fat, Ançeloti ka gjetur tre të tjerë.
Discussion about this post