Nuk duket se ka për të qëndruar i papunë për një kohë të gjatë trajneri amerikan Jesse Marsch. Ai shihet si favoriti kryesor për të marrë drejtimin e Southamptonit. Për teknikun, i cili u largua nga Leeds United, ekipi nga jugu i Anglisë duket se është i duhuri për të vazhduar karrierën si trajner në Premier League.
Në Britani bëjnë me dije se bisedimet mes “The Saints” dhe Marsch kanë ecur në mënyrën e duhur dhe zyrtarizimi mund të vijë së shpejti. Marsch u largua nga drejtimi i Leeds United pas humbjes në Premier League, që pësoi nga Nottingham Forest, me rezultatin minimal 1-0. Ai e drejtoi Leedsin për 37 ndeshje, ku arriti 11 fitore, 10 barazime dhe 16 humbje.
Në anën tjetër, Southamptoni largoi nga drejtimin Nathan Jones, pas disfatës së fundit në shtëpi përballë Wolves me rezultatin 1-2.
Jugorët aktualisht ndodhen në vendin e fundit në renditje me 15 pikë pas 22 ndeshjesh. Në tre sfidat e fundit në Premier, Southamponi ka pësuar tre humbje, gjë së solli edhe largimin e Jones nga drejtimi i ekipit.
Objektivi mbijetesë pritet t’i ngarkohet trajnerit Marsch, i cili ia doli mbanë sezonin e kaluar të shpëtonte Leedsin nga rënia, pasi e mbylli në vendin e 17-të në renditje. Pritet me kuriozitet si do të jetë ndeshja direkte mes Leeds edhe Southamptonit.
Discussion about this post