Njëri hidhet nga kati i katërt, tjetri bie aksidentalisht/ Një i vdekur dhe një i plagosur në Tiranë

Një person ka humbur jetën në kryeqytet orët e para të mëngjesit pas rënies nga lartësia, ndërsa një tjetër është plagosur.

Rasti i parë, sipas policisë, ka ndodhur rreth orës 00:40, në Rrugën e Dajtit. “Dyshohet se duke qenë në gjendje të dehur, aksidentalisht është rrëzuar nga një lartësi rreth 10 metra, në banesën e tij, shtetasi A.T., 63 vjeç. Si pasojë e dëmtimeve të marra ky shtetas ka ndërruar jetë në spital”, njoftoi policia.

Personi që policia i referohet në njoftim me iniciale A.T. është Arben Tafaj, ish-kandidati i pavarur i Bashkisë Tiranë dhe kryetari i shoqatës Tirana.

Për rastin e dytë, të njëjtat burime shtuan se “rreth orës 01:00, në rrugën ‘Margarita Tutulani’, dyshohet se është vetëhedhur nga kati i katërt i pallatit, shtetasi E. B., 50 vjeç. Si pasojë ky shtetas është dëmtuar dhe ndodhet në spital, në kujdesin e mjekëve”.

Personi që policia i referohet në njoftim me iniciale E.B. është balerini Eno Birko.

Po punohet për sqarimin e rrethanave të rasteve, shtoi policia.