“Njësiti” me vulë që mban peng deputetët

Nga Gjergji Koja

Një ditë më parë u raportua se një grup individësh që i paraqesin si anëtar të Kryesisë së PD zyrtare, nuk pranojnë mbledhjen e Këshillit Kombëtar për të votuar një vendim për zgjedhjen e kryetarit.

Ndoshta ata e kanë të qartë se struktura e tyre që e quajnë parti, meqë kështu vendosi Gjykata, nuk ka më forume, ndaj dhe me të drejtë zgjedhin rrugën e shkurtër për të vendosur dikë në krye.

Deri më sot kishim njohur disa modele të funksionimit të PD-së, nga ai i Berishës së parë (1992-1997) dhe më pas ato të Berishës së 2 dhe 3, deri sa në 2013, ia dorëzoi partinë Lulzim Bashës.

Pastaj njohëm modelin Basha, i ngjashëm me atë të Berishës së parë në pastrimin e partisë nga ata që mendonin ndryshe nga Luli apo që ai i shihte si rivalë të brendshëm në PD.

Modelet që u aplikuan rezultuan të gjithë të dështuar në raport me prodhimin e figurave rivalizuese në këtë parti, që sot nuk arrin dot të gjejë një emër që mund të marrë drejtimin e demokratëve përtej atij të Berishës dhe Bashës, që përjashtojnë njëri-tjetrin.

Sot në PD e vulës po aplikohet një model, që s’ka nevojë për kryetar, ata duan një komandant. Kjo pasi e kanë të qartë se nuk janë parti, por një “çetë”, ndërsa 17 -ja që ka marrë frenat në dorë funksionon si njësit gueril.

Dhe si të tillë ata veprojnë, brenda dhe jashtë zyrave. Ndoshta duke i njohur nga afër, kjo është arsyeja që Gazment Bardhi, nuk nguroi ti etiketonte si “paramilitarë” ata që mbrëmjen e së martës fyen e shanë deputetë e gazetarë.

Pyetja që shtrohet është a do pranojë grupi i deputetëve, që prej muajsh i qëndrojnë fort Sali Berishës përballë, t´i nënshtrohen “njësitit gueril” të anonimëve që i komandon Lulzim Basha dhe Enkelejd Alibeaj?

Të paktën 4 deputetë: Dashnor Sula, Saimir Korreshi, Gazmend Bardhi e Jorida Tabaku, me shumë gjasë do rezistojnë, ashtu sikundër mund të ndodhë që edhe të tjerë kolegë të tyre ta kuptojnë këtë situatë.

Siç po rrjedhin ngjarjet në “çetën” me vulë, çështja nuk shtrohet nëse “njësiti” politik i “paramilitarëve” do drejtohet nga Basha apo Alibeaj, por sa do munden ata të venë nën presion grupin e deputetëve që i konsiderojnë ushtarë të tyre?!

Deri më sot këta ligjvënës në emër të asaj që janë kundra Berishës, pas shpalljes non grata nga SHBA, i dhanë frymë, këtij modeli, që sot edhe i shan, edhe i fyen, edhe i kërcënon, edhe i paralajmëron, madje tenton ti mbajë edhe peng, njëlloj siç po mbajnë peng logo e vulë.

Të njëjtët do e kenë të vështirë, ndoshta edhe të pamundur të shpëtojnë siglën e marrë peng apo qoftë edhe të mbijetojnë në politikë, nëse do vendosen nën urdhërat e njësitit me 17 anëtarë.

Dhe në fund, ata ose do të mbahen mend si deputetët që shpëtuan siglën, ose si ligjvënësit që i rezistuan Berishës, por iu nënshtruan anonimëve që Basha ua la peshqesh si anëtarë Kryesie, dhe që funksionuan si “njësit”.