Noka: Opozita drejt një fronti ose federate, ja çfarë do të ndodhë…

Pas caktimit të 4 koordinatorëve që do të organizojnë aksionin opozitar, deputeti demokrat Flamur Noka paralamëroi krijimin shumë shpejt të një fronti të gjerë opozitar, për t’u përballur me qeverinë e kryeministrit Edi Rama.

Noka tha se koordinatorët janë propozuar nga Sali Berisha dhe kryesia miratoi këto propozime, duke shtuar se ata janë përcaktuar në rajone të ndryshme të Shqipërisë. Ndërkohë Belind Këlliçi është caktuar si drejtues politik për Tiranën.

Ai tha gjithashtu se PD e drejtuar nga Berisha është në bisedime me të gjithë aleatët për krijimin e një konfederate të gjerë opozitare.

“Kjo është një kërkesë e kahershme e çdo demokrati në bazë dhe Kryesia i ka hapur rrugë. Çështje ditësh do të merrni vesh lajmin. Katër koordinatorët janë ndihmës në çështjet e organizimit të partisë.

Kryesia miratoi propozimin e kryetarit dhe ata që nesër do të vijojnë punën. Partia do të ristrukturohet dhe do të përballet me qeverinë. Kolegët e Partisë së Lirisë janë pjesë e jona në këtë përballje kudo dhe jo vetëm në Parlament.

Ne jemi në bisedime me të gjithë aleatët, që të krijojmë një fedetarë, front, opozitar. Shumë shpejt PD e bashkuar totalisht përballë regjimit. Të gjithë me një qëllim, gjynjëzimin e këtij regjimi dhe rikthimin e votës së lirë të vjedhur nga Rama dhe klika e tij”, tha Noka.

Deputeti demokrat komentoi edhe vendimin e djeshëm të Sekretariatit Etik të Kuvendit, i cili përjashtoi nga 10 në 20 ditë nga punimet e Parlamentit 19 deputetë opozitarë.

“Vendimet për të përjashtuar dhe shpallur armiq deputetët e opozitës, të cilët në seancën e fundit demonstruan krejtësisht brenda rregullores, me pankarta, tregon se regjimi ka një vullnet për të asgjësuar çdo gjë, forcë dhe kundërshtar që nuk mund të hyjë në kthetrat e tij. Rama po hedh hapat më të rrezikshëm të instalimit të një neodiktature.

PD është e vendosur të qëndrojë përballë dhe diskutuam format e diversifikimit dhe përshkallëzimit duke e çuar me mosbindje civile. U diskutuan dhe format e përshkallëzimit që do të zbresim në të gjitha degët e Shqipërisë, do të ketë protesta në të gjitha rrugët”, tha Noka.