Noka: Po stërvitet garda për të luftuar opozitën, ja ç’pritet…

Flamur Noka u shpreh se Parlamenti sot nuk ka dinjitet, ndërsa drejtohet nga një “kukull barby” që merr udhëzimet nga zyrat e Kryeministrisë.

Në emisionin “Kjo Javë”, Noka tha se Lindita Nikolli do të mbahet mend për mënyrën se si ka drejtuar Kuvendin dhe si e ka katandisur institucionin më të rëndësishëm të vendit.

“E dini ju që kanë gardistët 3 ditë që bëjnë stërvitje se si do të luftojnë opozitën? i keni parë ato pamjet se si gardistët po stërviten për të rrethuar opozitën? Ky është një turp, përveç se është tërësisht anti-ligjore.

Kuvendin e Shqipërisë e kanë drejtuar me dinjitet Servet pëllumbi, Gramoz Ruçi, Namik Dokle, Ilir Meta, që të gjithë të majtë, por përtej debateve tregonin dinjitet në drejtimin e Kuvendit. Ndërsa Linda e Parlamentit e ktheu në një sallë pa dinjitet”, tha Noka.

Ai tha se opozita është në betejë dhe nuk ka polici dhe gardë që mund ta ndalojë këtë betejë. “Ne kemi vendosur të jemi luftëtarë të lirisë”, tha Noka.

Ai u shpreh se zgjidhja është respektimi i Kushtetutës, ligjeve të vendit, të njihet opozita e këtij vendi, dhe mos njohë si opozitë “Frontin Demokratik”.

Noka paralajmëroi se ditën e hënë në seancë do të shihni një betejë kundër anti-ligjit dhe anti-regjimit. “Do shihni betejë, opozita nuk tërhiqet, nuk ka polici apo gardë që mund ta ndalë”, tha Noka.