Richard Grenell, një prej zyrtarëve më të lartë në administratën amerikane gjatë Presidencës së Donald Trump, u shpreh mbrëmjen e së enjtes se ai nuk ka parë kurrë një dokument për Sali Berishën në Departamentin e Shtetit që ta lidhte atë me shpalljen non grata.
Grenell ka mbajtur detyrën e drejtorit të Byrosë Kombëtare. Ai thotë se pavarësisht detyrës së lartë, nuk ka parë diçka për Sali Berishën.
Në një intervistë për Top Story, Grenell shprehet se vendimin e ka marrë Antony Blinken të cilin e quajti partiak dhe të politizuar.
Ai tha gjithashtu se Blinken nuk i ka dhënë informacione kongresmenëve republikanë, për pyetjet që i kanë dërguar Sekretarit të Shtetit për shpalljen non grata të Berishës.
“Berishën nuk e kam takuar asnjëherë. Unë dhe shumë konservatorë jemi shumë të shqetësuar me Blinken, është shumë partiak, shumë i politizuar, është e trishtë ajo që i ka bërë DASH-it. Ai shumë herë tha kam informacione për Berishën, do të vendosim partinë konservatore të Shqipërisë në sanksione dhe shumë njerëz u çuditën. Ne kërkuam prova, i kërkuam DASH-it informacione. Unë isha drejtor në detyrë i Byrosë Kombëtare, unë kisha edhe një rol të dyfishtë si ambasador në Gjermani dhe i dërguar i posaçëm në Ballkan. Si drejtor në detyrë u përfshiva shumë në informacione për Ballkanin. Unë do ta dija diçka të tillë për atë që po ndodhte në Ballkan me partinë konservatore. Nuk e pashë kurrë. Nuk po sugjeroj se nuk ka, por unë nuk pashë diçka të tillë. Mendoj se është e rëndësishme që DASH t’u përgjigjet anëtarëve të Kongresit Republikan që kanë kërkuar ta shikojnë këtë informacion. Kjo është një akuzë e rëndë. Kur DASH shkon pas një partie konservatore në një vend tjetër dhe bën këto akuza dhe republikanët e Kongresit thonë ku janë këto prova, ku është ky informacion na i tregoni edhe ne dhe ata nuk e kanë bërë, ke krijuar një dyshim”, tha ai.
Pyetje: Hetimet për Sali Berishën nisën që në administratën Trump?
Grenell: Unë nuk pashë asgjë të tillë. Anëtarët e Kongresit duhet të informohen. Vendimi qartazi u mor nga zoti Blinken. U detyrohemi anëtarëve të Kongresit që të bëjnë përpjekje dhe të marrin përgjigje.
Discussion about this post