Katër zyrtarët dhe ish-zyrtarët e Bashkisë Fier, mes të cilëve ish-nënkryetarja Adela Hysenaj, do të qëndrojnë në të njëjtat masa paraprake që kishte dhënë Gjykata e Fierit, duke i konfirmuar ditën e sotme.
Zyrtarët akuzohen se nuk arkëtuan mbi 400 mijë euro nga taksat e parkingut publik që administron Bashkia, duke shpërdoruar detyrën në disa raste dhe favorizuar persona të caktuar.
Gjykata e Shkallës së Parë e Juridiksionit të Përgjithshëm Fier, nën drejtimin e gjyqtares Aurora Tusha, ka pranuar kërkesën e Prokurorisë për marrjen në pyetje të katër personave nën hetim për veprat penale të shpërdorimit të detyrës dhe ushtrimit të ndikimit të paligjshëm ndaj funksionarëve publikë.
Prokuroria e Fierit kërkoi marrjen në pyetje të katër personave, mes të cilëve edhe ish-zyrtarë të lartë të Bashkisë Fier dhe administratës tatimore. Sipas vendimit të gjykatës, Adela Hysenaj (ish-zv/kryetare e Bashkisë Fier dhe ish-drejtoreshë e Taksave dhe Urbanistikës) dhe Vasil Ceku (drejtor në Drejtorinë Rajonale Tatimore Fier) do të vijojnë të mbahen në “arrest shtëpie”.
Ndërkohë, për Anisa Cjapin (drejtoreshë aktuale e Taksave dhe Tarifave Vendore) dhe Martin Dodin (sekretar i përgjithshëm i Bashkisë Fier), masa e sigurisë mbetet “pezullim nga detyra”. Megjithatë, gjykata ka vendosur të revokojë ndalimin për të lënë vendin për Dodin, ndërsa për Cekun është hequr pezullimi nga detyra, por ai mbetet nën masën e “arrestit shtëpiak”.
Kujtojmë se operacioni “Parking” u finalizua pas një hetimi disa mujor nga Seksioni për Hetimin e Krimeve Ekonomiko-Financiare në DVP Fier, nën drejtimin e Prokurorisë së Fierit. Hetimi zbuloi një dëm prej rreth 40 milionë lekësh në buxhetin lokal si pasojë e mospajisjes me kasë fiskale të parkimit nëntokësor dhe favorizimit të subjekteve private përmes uljes së padrejtë të taksave.
Discussion about this post