Kandidatja e Partisë Socialiste për deputete, Blerina Gjylameti, e cila nuk arriti të sigurojë një mandat në zgjedhjet e 11 majit, ka reaguar publikisht pas përfundimit të procesit të numërimit të votave.
Në një postim në Facebook, Gjylameti nuk shprehet e keqadhur për humbjen, pasi sipas saj 11 maji për të ishte një përvojë e fituar.
Gjylameti falenderon qytetarët e Njësisë nr. 4, por dhe të gjithë qarkut të Tiranës dhe votuesit nga diaspora, duke theksuar se çdo votë dhe çdo shprehje besimi është një “gur i çmuar në themelin e një Shqipërie më të mirë”.
“Kam një përqafim të madh për secilin prej jush dhe s’jeni pak, 6148 zemra! Të gjithë ju që më besuat gjënë më të çmuar që një qytetar ka: votën,” shkruan ajo.
Gjylameti shpreh falënderime të veçanta për ekipin, familjen dhe Kryeministrin Edi Rama për mbështetjen e dhënë gjatë fushatës.
“Këto zgjedhje, kjo garë, më kanë dhënë vetëdijen e plotë pse jam në politikë, pse në PS, dhe bindjen e thellë se Partia Socialiste është forca që i duhet vendit në këtë moment historik,” shprehet ajo.
Mesazhi përfundon me një reflektim dhe vendosmëri për të vazhduar angazhimin politik:
“Zgjedhjet mbaruan. Sovrani foli. Politika për njerëzit vazhdon.”
Reagimi i Gjylamentit:
Të dashur miq, familjarë dhe mbështetës të mi në garën e 11 majit,
Kam një përqafim të madh për secilin prej jush dhe s’jeni pak, 6148 zemra! Të gjithë ju që më besuat gjënë më të çmuar që një qytetar ka: votën.
Kudo që ishit, në Njësinë 4, në të gjithë qarkun e Tiranës, dhe mbi të gjitha ju që votuat nga diaspora, dua t’ju them faleminderit.
Çdo votë, çdo shprehje besimi, është një gur i çmuar në themelin e një Shqipërie më të mirë.
Në këtë garë nuk ka humbës, ka vetëm të fituar. Dhe unë e besoj këtë me gjithë zemër.
Të gjithë kemi fituar vazhdimësinë në rrugën drejt së ardhmes europiane.
Unë personalisht kam fituar zemrat tuaja, respektin tuaj, mbështetjen tuaj, dhe për këtë ju jam thellësisht mirënjohëse.
11 maji për mua ishte një fitore e një lloji tjetër: një përvojë e vlefshme, një garë sfiduese dhe një rezultat që më mbush me krenari.
Faleminderit secilit prej jush.
Faleminderit ekipit tim të palodhur, familjes sime të duruar, dhe në veçanti Kryeministrit Edi Rama, për besimin dhe përkrahjen.
Sidomos në këto ditë të lodhshme e sfiduese, të mbushura me emocione, ne – më mirë se kushdo tjetër, e kuptojmë sa e vështirë është të mbash bashkë një familje të madhe si Partia Socialiste.
Beteja jonë vazhdon. Për angazhimet që kjo forcë politike ka marrë.
Ne nuk bëjmë luftëra të vogla, ne bëjmë beteja të mëdha për jetët e njerëzve, aspak për jetët tona.
Mirënjohëse.
Këto zgjedhje, kjo garë, më kanë dhënë vetëdijen e plotë pse jam në politikë, pse në PS, dhe bindjen e thellë se Partia Socialiste është forca që i duhet vendit në këtë moment historik.
Zgjedhjet mbaruan. Sovrani foli. Politika për njerëzit vazhdon
Discussion about this post