“Nuk bëri rezistencë, na tërhoqën me forcë”, Peca që ndodhej në makinë me Metën tregon arrestimin

Sekretari Organizativ i PL, Artemis Peca ndodhej në automjet me Ilir Metën kur ky i fundit u arrestua nga agjentët e BKH ditën e sotme, në hyrje të kryeqytetit.

Peca tregoi se ish-Presidenti i Republikës nuk bëri rezistencë, por u kërkoi mandatin e arrestit agjentëve. Megjithatë, sipas tij, ata u nxorën me forcë nga automjeti ku ndodheshin.

“Zoti Meta nuk ishte me njeri tjetër dhe as eskortë. Ilir Meta nuk është frikacak. Nuk pati rezistencë. U tregua i sjellshëm. U kërkoi mandatin dhe ata në asnjë moment nuk e dëgjonin. Vetëm tërhiqnin me forcë. Më pyetën kush jeni ju. U thashë na tregoni kush jeni. Ne nuk treguan asnjë lloj rezistence”, tha Peca.

I pyetur se pse Meta nuk kishte truproja me vete ose Gardën, ai u përgjigj duke thënë “sepse Meta nuk ka kryer asnjë krimin dhe nuk ka patur frikën. Garda nuk ka qenë sepse nuk ka patur dijeni ku ka qenë ish-presidenti i Republikës”.

gijotina.com/