Deputeti socialist i qarkut të Beratit, Bardhyl Kollçaku në një intervistë për Gijotina.com ka rrëfyer më shumë rreth jetës së tij profesionale, ku tregon se përse pas 38-vjetësh karriere ushtarake, vendosi të kandidonte në listat e Partisë Socialiste më 25 prill. Kollçaku tregoi sipas tij, arsye se përse banorët e qarkut të Beratit e votuan, ndërsa u shpreh i sigurt se do të arrinte të përmbushte të gjitha premtimet elektorale të 25 prillit. Ndër të tjera, ai komentoi gjithashtu dhe problematikat kryesore të qarkut ku është votuar, ndërsa tha se tërmeti dhe pandemia ngadalësuan projektet e zhvillimit.
Ju vini nga një karrierë ushtarake disa vjeçare, me misione brenda dhe jashtë vendit, çfarë ju shtyu të futeni në politikë, dhe të bëheni pjesë e parlamentit shqiptar?
Bardhyl Kollçaku: Është e vërtetë, unë vij në politikë pas 38-vjetësh në shërbim të atdheut, duke kryer detyra brenda dhe jashtë vendit, nga ato më të ulëta, deri tek ajo më e larta, Shef i Shtabit të Përgjithshëm të Forcave të Armatosura. Pas mbylljes me sukses të karrierës ushtarake, mendova se me aftësitë, eksperiencën dhe energjitë e mia mund ta vazhdoja misionin që jam mësuar të bëj më mirë, atë të shërbimit ndaj njerëzve dhe atdheut, por në një dimension të ri, atë politik.
Partia Socialiste siguroi pesë mandate në qarkun e Beratit, njëri prej të cilëve i juaji, pse mendoni që qytetarët iu zgjodhën ju si përfaqësuesin e tyre në parlament dhe jo dikë tjetër?
Bardhyl Kollçaku: Është më e udhës të pyeten zgjedhësit e qarkut Berat përse me besuan mua, megjithatë po mundohem t’ju përgjigjem shkurt pyetjes tuaj: qytetarët e Beratit më besuan për atë që jam; për atë që kam bërë mirë, gjatë gjithë karrierës time ushtarake, dhe për besimin që ushtaraket janë njerëz të fjalës dhe të punës.
A jeni i sigurt nëse në këto katër vite do të arrini t’i përmbushni të gjitha premtimet elektorale të fushatës së 25 prillit?
Bardhyl Kollçaku: Jam i sigurt që do i mbaj angazhimet pasi kanë qenë të sinqerta, të thjeshta dhe të vërteta. Qytetarët do të kenë tek unë një përfaqësues që është 24/7 në shërbim të qytetarëve; do dëgjoj dhe “qaj” hallin e çdo qytetari duke e adresuar atë në institucionet përkatëse; nuk do lë “gur” pa lëvizur që problemet e qytetarëve të marrim zgjidhje; dhe më e rëndësishmja në fund të ditës t’ ju kthej përgjigje nëse problemi i tyre zgjidhet apo jo.
Cilat janë problematikat kryesore të qarkut tuaj dhe çfarë propozoni si zgjidhje?
Bardhyl Kollçaku: Qarku i Beratit gjatë qeverisjes së z.Rama ka përfituar shumë investime në infrastrukturë, rrugë e sheshe, ujësjellës, kanalizime, rrjetin elektrik, agro-biznes dhe turizëm. Ashtu si në gjithë Shqipërinë, tërmeti dhe pandemia ngadalësuan projektet e zhvillimit. Kryeministri Rama dhe qeveria kanë marrë angazhim të rritin investimet dhe përmirësojnë shërbimet në qarkun tonë gjatë mandatit të tretë, zhvillimi ekonomik i qëndrueshëm do të rrisë të ardhurat dhe të shtojë vendet e punës. Pas pak ditësh fillojnë punimet në Bazën Ajrore të NATO-s në Kuçovë, një investim mbi 40 milionë euro i Aleancës që do jetë një investim strategjik dhe të krijojë hapësira dhe vende të reja pune. Mandati im iu përket qytetarëve të Beratit dhe unë i qëndroj fjalës që iu kam dhënë bashkëqytetarëve të mi se nuk do resht asnjë minutë, për të bërë më të mirën për ta./ D.L/ Gijotina.com
Discussion about this post