Objektivi i Arsenal në merkaton e verës, Armando Broja, do t’i përshtatej shumë mirë filozofisë së Mikel Artetës sipas ish-sulmuesit të “Topçinjve”, Kevin Campbell. Duke folur për “Football Insider”, Campbell tha se golashënuesi më i mirë i Southampton këtë sezon po luan shkëlqyeshëm në huazimin e tij të parë në një klub të Premier Ligës.
Sulmuesi shqiptar i Chelsea ka tërhequr vëmendjen e shumë klubeve të mëdha me paraqitjet e tij dhe një mes tyre është edhe Arsenal, që ka nisur të monitorojë situatën e talentit. Transferimi i Brojës në “Emirates” shkon në linjën e menaxhimit të teknikut spanjoll, i cili beson më shumë te të rinjtë sesa në investime me shifra të çmendura.
“Problemi me Chelsea është se ata kanë shumë lojtarë në skuadër”, tha Campbell në lidhje me një rikthim të mundshëm të Brojës në “Stamford Bridge” në fund të sezonit.
“Ata mund të thonë se nuk duan ta shesin te një klub rival. Por nëse ai djalë i ri dëshiron të bëjë një karrierë, ai nuk do të dojë që të shkojë në huazim gjatë gjithë kohës apo të ngecë me rezervat. Ai do të dojë të transferohet. Unë nuk e di se sa i fortë është interesi i Arsenal, por ai po luan shkëlqyeshëm te Southampton. Ai është një futbollist i ri, një sulmues me shumë potencial, i cili i shkon për shtat modelit të Arsenal në këtë moment.
Nuk e di se cili është qëndrimi i Chelsea në lidhje me shitjen e lojtarëve te një rival për vendin e katërt, por Chelsea nuk do ta ketë të mundur që t’i mbajë të gjithë të lumtur këtë verë, kjo është e sigurt”.
Broja, i cili ka një kontratë deri në vitin 2026 në “Stamford Bridge”, ka shënuar 8 gola këtë sezon në “St Mary’s”, 6 prej të cilëve në Premier League. Chelsea e ka vlerësuar fillimisht me 25 milionë paund kartonin e produktit të akademisë.
Por nëse ai do të vazhdojë të përmirësohet me të tilla margjina deri në fund të sezonit, e sigurt është se kampionët e botës do t’i ndryshojnë pretendimet e tyre për kartonin.
Gati gjysma e Premier League është në gjurmët e Brojës. Southampton është i gatshëm të paguajë menjëherë shifrën e 25 milionë paundëve, e cila do ta bënte atë transferimin më të shtrenjtë të historisë. Ndërkohë që në Gjermani interesohen edhe dy gjigantët e Bundesligës, Bayern Munich dhe Borussia Dortmund.
Discussion about this post