Vasil Bedinaj, kreu i operatorëve turistikë për jugun ka dhënë dorëheqjen nga posti i tij. Sipas tij, arsyeja e dorëheqjes ka ardhur pasi s’kanë mundur ta shpallin Vlorën kryeqytet të festimeve për 28-29 Nëntorin dhe festat e fundvitit.
“Në biznes kam drejtuar përherë me përgjegjësi, përgjegjësi ndaj atyre që më besojnë pra klientëve dhe përgjegjësi për ata që i quajmë familje dhe që janë stafi ynë. Por më shumë përgjegjësi për ata çfarë përfaqësoj që është biznesi dhe shtëpia e madhe, Vlora.
Gjithmonë kam qenë në pararojë të ndryshimit, kam kërkuar më të mirën , kam ndihmuar dhe jam përpjekur që turizmi në Vlorë të jetë si e meriton, elitar. Kam qenë edhe kritik, si sot… kur kërkoj dhe besoj se me të drejtë duhet të kishim qenë destinacioni kryesor për festa. Por, marketingu i përgjithshëm për qytetin, agjendën festive nuk eci njësoj as me përpjekjen tonë individuale si biznese dhe as me promovimin e destinacionit që bënë qytete të tjera, më të vegjël se Vlora dhe më pak të lidhur me tematikën Historike.
Meritonim të ishim të parët dhe s’ia dolëm. Për këtë ndihem fajtor që ne si biznese nuk investuam sa duhet, nuk kërkuam sa duhet nga bashkia, nuk arritëm të jemi kryeqyteti i Shqipërisë në Nëntor. Ndaj, marr përgjegjësi të plotë dhe jap dorëheqjen nga kreu i shoqatës së Unionit Turistik për Jugun” ” – shprehet Bedinaj.
Ai më tej shprehet se me këtë dorëheqje, për punët e parealizuar dhe projektet e lëna në mes, të jetë shembull se si njerëzit duhet të mbajnë përgjegjësitë e tyre.
“Shpresoj që për punët e parealizuara, për projektet e lëna në mes, për të treguar përgjegjshmëri për qytetin dhe atë çfarë përfaqësojnë, t’iu kem dhënë edhe të tjerëve një model, si të largohesh denjësisht. Të tërhiqesh nuk është turp, turp është të dëmtosh me vetëdije e të mos pranosh të ikësh edhe kur nuk po bën asgjë. Dorëheqja është nder!”
Dorëheqja i është depozituar Unionit të Turizmit Shqiptar dhe anëtarësisë në Vlorë më 29 Nëntor, duke i hapur rrugë zgjedhjes së kryetarit të ri. Zgjedhjet e reja do të mbahen më 22 Dhjetor.
Discussion about this post