Francesco Totti ka rrëfyer në një intervistë për mediat italiane marrëdhënien e tij me Alesandro Del Pieron dhe eksperiencat e tyre së bashku, duke sugjeruar edhe praninë e tij në kryesinë e Juves.
Shumë vite kundër Del Pieros, por gjithmonë me vlerësimin më të lartë…
Kemi kaluar disa vite si kundërshtarë, por me respektin dhe miqësinë më të madhe. 2006 na bashkon, është hera e vetme që kemi arritur të luajmë vërtet së bashku.
Si ishin fillimet?
Për ne ishte gjithçka e re, ne e dinim se para nesh kishte një botë tjetër, kjo është ëndrra jonë për t’u bërë lojtarë dhe ia dolëm.
Sa ju ka stimuluar krahasimi me Del Pieron?
Isha i lumtur me atë që po bënte Alex, por isha i lumtur me atë që po bëja edhe vetë. Ne menduam të bëjmë më të mirën për Romën dhe Juventusin. Kemi pasur gjithmonë respekt për njëri-tjetrin, një respekt i vërtetë mes dy njerëzve edhe jashtë fushës.
Jeni penduar që keni luajtur pak me Del Pieron?
Po.
E keni parë lamtumirën e Del Pieros?
Fatkeqësisht isha duke luajtur, e pashë përsëri më vonë. Nuk është e lehtë të gjesh fjalët për të përshkruar atë që po kalon, por mund ta imagjinoja se çfarë mund të mendojë ai brenda vetes.
E keni paguar shtrenjtë popullaritetin tuaj?
Mendoj se bëra timen dhe njerëzit më bënë të ndihem ndryshe nga të tjerët, ishte zgjedhja e tyre. Është e qartë se skuadra dhe klubi më ndihmuan të isha lojtari që isha. Kur u bëra drejtues (në thonjëza) kuptova se nuk kisha mundësi të shprehja mendimin tim. Problemi është se brenda disa klubeve duhet të ketë nga ata që kuptojnë futbollin, me gjithë respektin, nuk duhet të ketë avokatë apo llogaritarë. Nëse do të isha Juventus, një djalë si Del Piero duhet të jetë në klub, pikërisht për atë që ka bërë, për aftësinë sportive që ka, flasim për dikë që ka bërë histori të futbollit. Ai di si ta trajtojë situatën, si të zgjedhë lojtarë. Pyes veten pse njerëz si Maldini dhe Del Piero janë jashtë?.
Kupa e Botës 2006?
Ne mblidheshim ditë pas dite, e dinim që ishim një ekip i fortë. Ishte një muaj respekti, ngrohtësie, një bashkim i fortë. Lippi ishte i mirë në krijimin e një grupi me kaq shumë kampionë. Mua më priti deri në fund pas dëmtimit. Prej andej u ndez një sustë e brendshme që të rikuperohesha dhe të luaja në Botëror
.Jeni grindur për zgjedhjen e numrit 10?
Kurrë, nga ky këndvështrim ka pasur gjithmonë respektin maksimal.
Çfarë do të thotë të jesh kapiten?
Shumë, duhet të jesh ndryshe nga të gjithë të tjerët. Duhet të ndihmosh djemtë, trajnerin, klubin, duhet të jesh gjithmonë aty në momente të vështira. Është një përgjegjësi ndryshe nga gjithë të tjerat, duhet të menaxhosh ambientin dhe të dish të veshësh shiritin në krah dhe nuk është e lehtë.
Discussion about this post