Kryeministrit Edi Rama duket se nuk ka arritur të hedhë pas krahëve marrëdhënien toksike që ka me kryetarin aktual të Vlorës, Dritan Leli, pasi planin për pastrimin rrënjësor të Shqipërisë, e nisi pikërisht nga ky qytet.
Me dorashka dhe qese në duar, vetë kryeministri i shoqëruar nga ministrja e Turizmit Mirela Kumbaro, ministri i Mbrojtjes Niko Peleshi dhe të rinj, kanë nisur pastrimin e mbeturinave.
Krisja e marrëdhënieve të Ramës me Lein nisi që në fushatën e 25 prillit, ku Leli refuzoi të heqë dorë nga posti aktual për t’u bërë deputet, dhe që nga ajo dita nuk kanë munguar ironitë apo kritikat ndaj tij.
Lidhur me pastrimin e mbetjeve, vetëm disa muaj më parë, gjatë një vizitë në Vlorë, Rama pastroi një ambient sportiv që ishte mbushur me plehra dhe tha se është turp që turistët shqiptarë dhe të huaj të shohin mbeturina përtokë.
Ndërsa, ditën e sotme ai paralajmëroi sanksione për bashkitë dhe kryetarët që nuk bëjnë pastrimin e mbetjeve, si një mesazh indirekt drejtuar Lelit.
“Ministrja së bashku me të deleguarit, do të jenë në çdo mbledhje të këshillit bashkiak. I bëj thirrje të rrëzojnë buxhetin nëse nuk sjellin fonde të domosdoshme për pastrimin. Çdo bashki ka në dispozicion një pikë fundore për pastrimin e mbetjeve. Është e pa tolerueshme që mbetjet të grumbullohen në mes të rrugës. Pikat fundore janë pikat teknologjike të trajtimit të mbetjeve, dhe fushat sanitare. Asnjë bashki nuk do lejohet që për justifikime, në vend që t’i çojë në pikën fundore të krijojë pika të tjera të paligjshme. Për këtë ligji parashikon sanksione për kryetarët dhe bashkitë”, tha Rama.
Gjatë fjalës së tij, Rama tha se mbetjet urbane nuk janë sjellë nga fuqi e mbinatyrshme, por nga dora e njeriut, dhe se të jesh patriot nuk do të thotë që të marrësh pushkën dhe të lufton për atdheun nga Facebook.
Discussion about this post