Brenda ditës së sotme Rama ka bërë deklarata të ndryshme ndaj SPAK, ku njëherë thoshte se u ngrit dhe mbrohet nga PS, ndërsa tani si kreu i PS po shpërhten me sulme.
Kryeministri Edi Rama ka shprehur shqetësimin e tij për masat e sigurisë të marra ndaj 24 personave të lidhur me hetimet mbi Universitetin Bujqësor të Tiranës. Gjatë një deklarate të mbajtur sot, ai kritikoi veprimet e drejtësisë, duke i cilësuar ato si të tepërta dhe të dëmshme për reputacionin e vendit.
“Më mirë 10 të fajshëm jashtë sesa një i pafajshëm në burg. Drejtësia nuk mund t’i bjerë më qafë askujt pa lidhje,” tha Rama, duke theksuar se veprimet e fundit kanë tronditur një universitet të tërë dhe kanë rrezikuar një marrëveshje të rëndësishme me partnerët austriakë.
Kryeministri kujtoi përpjekjet e tij për të sjellë Universitetin e Vjenës në Shqipëri, duke treguar për takimet që kishte zhvilluar me drejtuesit e këtij institucioni.
“Kam shkuar unë si lyps te shkallët e Universitetit të BOKU-s. Më thanë se isha i pari kryeministër që vizitonte atë universitet dhe i luta të vinin në Shqipëri për të hapur një universitet austriak. Sot, ai që ishte rektor atje, punon për universitetin tonë,” tha ai.
Rama njoftoi se në Kamëz do të ndërtohet një degë e Universitetit të Vjenës, duke e cilësuar këtë si një projekt të rëndësishëm për arsimin shqiptar. Ai shprehu shqetësimin për mënyrën se si ky proces mund të interpretohet nga partnerët ndërkombëtarë. “Si i shpjegohet austriakëve që në Shqipëri merren 24 masa sigurie, sikur të kishim të bënim me një operacion kundër mafias në fshatin e Corleones? Këto i bën prokuroria antimafia në Itali,” përfundoi ai.
Discussion about this post