Komisioni i Pavarur i Kualifikimit, ka konfirmuar sot në detyrë prokuroren Tiranës, Silvana Lule. Gjatë seancës dëgjimore të zhvilluar të mërkurën më 27 tetor, Komisioni evidentoi mungesë të burimeve financiare të bashkëjetuesit të Lules në blerjen e një apartamenti dhe të dy makinave. Por ditën e sotme Lule dha shpjegime dhe kërkoi që në vlerësimin përfundimtar të mos përfshiheshin pasuritë e tij. Gjithashtu, u relatuan edhe tre denoncime për të cilët subjekti tha se kishte kryer hetime të plota.
Duke marrë parasysh arsyetim e saj dhe të dhënat e grumbulluara nga hetimet, komisioni doli në përfundimin se denoncimet nuk qëndronin dhe për këtë arsye votoi pro pastërtisë së figurës për prokuroren.
Procesi i rivlerësimit për prokuroren Lule u krye nga trupa e KPK e kryesuar nga Genta Tafa Bungo, me relatore Alma Faskajn dhe anëtar Lulzim Hamitajn. Silvana Lule përfundoi studimet në Shkollën e Magjistraturës në vitin 2009 dhe u emërua në Prokurorinë e Vlorës. Prej vitit 2015, ajo e ushtron funksionin në Prokurorinë e Rrethit Tiranë.
