Komisioni i Pavarur i Kualifikimit shkarkoi nga detyra prokurorin e Vlorës, Erion Çelaj pas problemeve me justifikimin e pasurisë.
Relatimi i KPK-së për pasurinë u fokusua më së shumti në një apartament në Selitë të Tiranës, i blerë nga subjekti në vitin 2012 kundrejt çmimit 48 mijë euro, pasuri për të cilën Çelaj pretendoi se nuk kishte shpenzuar asnjë “qindarkë” dhe se i ishte dhuruar nga vjehrri.
Çiftja sqaroi se subjekti kishe deklaruar si burim krijimi të kësaj pasurie në vitin 2012 marrëveshjen e vjehrrit të ndjerë më një shoqëri ndërtuese. Nga verifikimi i pronës ka rezultuar se është e regjistruar në dy apartamente të ndryshme, që janë bashkuar në një.
Komisioni vëren se kontrata e shitblerjes ishte nënshkruar nga prokurori Çelaj dhe se është shënuar se vlera 48 mijë euro është likuiduar plotësisht. Sipas relatores, subjekti ka shpjeguar se kontrata ishte nënshkruar vetëm prej tij, pasi bashkëshortja ishte e angazhuar në disa situata familjare. Por, sipas KPK-së, nga hetimi administrativ nuk është provuar marrëdhënia mes ndërtuesit dhe vjehrrit dhe as përfitimi i ndonjë apartamenti nga ortaku i tij.
Komisioni konstatoi gjithashtu pamundësi financiare për krijimin e një depozite 100 mijë lekë në vitin 2009 si dhe mungesë financiare në blerjen e dy automjeteve.
Sipas KPK, nuk është provuar as burimi i ligjshëm i krijimit të dy depozitave në emër të dy fëmijëve në shumat nga 3990 USD secila. Sipas Çiftjas, subjekti ka deklaruar se vlerat e këtyre depozitave janë dhuruar nga vëllai i bashkëshortes që ka jetuar dhe punuar në Itali për periudhën 2007-2011 dhe se i kishte deklaruar ato saktësisht.
Komisioni ngre dyshime për trajtim preferencial në blerjen e një automjeti tip Benz në vitin 2004 kundrejt shumës 500 mijë lekë. Sipas Çiftjes, shitësi e kishte blerë këtë makinë 20 ditë më parë në shumën 743 mijë lekë. Çelaj pretendoi se këtë makinë e kishte parë kur kalonte në qytetin e Fierit dhe se nuk e njihte shitësin.
Në seancë u evidentua gjithashtu edhe mos deklarimi i zotërimit të 50 aksioneve në Shoqërinë Albtelecom. Sipas relatores, subjekti nuk i ka deklaruar asnjëherë në vite këto aksione.
Çelaj e kundërshtoi analizën financiare dhe pretendoi se të gjitha të ardhurat e familjes së tij rridhnin nga burime të ligjshme. Ish-prokurori e ka filluar karrierën në sistemin e drejtësisë në vitin 1998 dhe ka punuar fillimisht si prokuror në Përmet dhe në Fier. Prej vitit 2008, ai e ushtron funksionin në Prokurorinë e Rrethit Vlorë.
