Nuk ka armëpushim në Gaza, Izraeli godet shtëpinë e kreut të Hamasit

Avionët izraelitë goditën natën e mbrëmshme shtëpinë e Ismail Haniyeh, kreut të Byrosë Politike të Hamasit në Gaza. 

Ushtria e bëri të ditur këtë, sipas së cilës shtëpia “u përdor si një infrastrukturë terroriste dhe shpesh priste takime të liderëve të Hamasit për të drejtuar akte terroriste kundër civilëve dhe ushtarëve izraelitë”. 

Ushtria shtoi se duke marrë kampin e refugjatëve Shati, ushtarët gjetën dhe shkatërruan një depo armësh të forcës detare të Hamasit “që përmbante pajisje zhytjeje, pajisje shpërthyese dhe armë”.

Ndërkohë janë bllokuar negociatat midis Izraelit dhe Hamasit për lirimin e pengjeve në këmbim të një armëpushimi në Rrip.

Sipas gazetë Haaretz, ajo që bllokoi një marrëveshje të mundshme ishte mungesa e marrëveshjes për kohëzgjatjen e ndalimit të luftimeve.

“Tel Aviv ndalon armëpushimin për të vazhduar sulmin”, thotë Hamasi.