Ka përfunduar në barazim 1-1 derbi i Italisë ndërmjet Interit dhe Juventusit. Në sfidën e zhvilluar në “San Siro” skuadrat zhvilluan një ndeshje shumë të fortë teksa në fund ndanë pikët edhe pse mes polemikave. Interi kaloi në avantazh në pjesën e parë me sulmuesin Edin Xheko. Shtatlarti përfitoi nga një top që fillimisht u ndal në traversë pas goditjes së Çalhanoglu duke shënuar me portën e boshatisur.
Në pjesën e dytë Juventus e kërkoi me shumë ngulm golin e barazimit dhe e gjeti nga pika e bardhë e 11-të metërshit me Paulo Dibalën. Argjentinasi mposhti portierin Handanoviç duke realizuar golin shpëtimtar për bardhezinjtë. Ekipet luftuan fort deri në fundin e lojës por nuk pati më gola të shënuar. Interi dhe Juventusi morën nga një pikë që nuk i bën shumë punë për objektivat sezonale.
