Nuk ka fitues në sfidën Udinese-Lazio e cila përfundoi me rezultatin 1-1. Ekipet ndanë nga një pikë në këtë takim, ku golit të Deulofeu iu përgjigj Felipe Anderson në fundin e pjesës së parë. Takimi do të niste mirë për friulanët të cilët do të gjenin golin që në minutën e 5’. Një harkim në zonë u devijua nga Perez që gjeti të lirë Deulofeun. Ky i fundit nga shumë pranë portës së Strakoshës nuk fali dhe e çoi topin në rrjetë.
Lazio filloi të merrte në kontroll frenat e ndeshjes me Cabral që nuk shfrytëzoi disa raste që iu dhanë. Megjithatë, në fundin e pjesës së parë, Felipe Anderson vendosi baraspeshën. Krosimi i Cataldit u devijua në zonë nga Zaçagni, ndërsa topi shkoi në këmbët e Felipe Anderson. Ky i fundit me portën e boshatisur nuk mund të bënte asgjë tjetër veçse të shënonte. Në pjesën e dytë ritmi i takimit ra ndjeshëm dhe të dyja ekipet u dukën të kënaqura nga pika e marrë.
Discussion about this post