Gjykata Kushtetuese do të mblidhet sërish ditën e sotme për të shqyrtuar çështjen e mbetur pezull për shkarkimin ose jo të presidentit Ilir Meta. Seanca e tretë për shkarkimin e kreut të shtetit në Kushtetuese do të nisë në orën 10:00.
Në seancën e fundit, përfaqësuesit ligjor të Presidentit u mbrojtën duke kundërshtuar të gjithë procedurën që ishte ndjekur nga Parlamenti në legjislaturën IX për ngritjen e komisionit hetimor për shkarkimin e Presidentit.
Sipas tyre, Presidentit të Republikës iu mohua e drejta për t’u dëgjuar në Parlament para se të merrej vendimi për ngritjen e komisionit hetimor. Ndërsa një tjetër moment ku u ndal mbrojtja e Presidentit ishte fakti se Kuvendi nuk kishte legjitimitet për të kryer hetimin.
Përfaqësuesit e kreut të shtetit cituan përcaktimin e Kushtetutës se Kuvendi nuk mund të kryejë asnjë hetim parlamentar në 4 muajt e fundit të mbarimit të mandatit. Ndërkohë, pas pretendimeve të Presidencës, trupa gjykuese e Gjykatës Kushtetuese drejtoi 70 pyetje ndaj tyre.
Ndërkohë për të dhënë përgjigje këtyre pyetjeve juristët e presidencës kanë kërkuar 48 orë kohë, ndërsa Meta në momentin e mbërritjes së pyetjeve premtoi se do t’i lexojë të gjitha para qytetarëve.
Discussion about this post