Nuk ka mrekulli në Durrës, Tirana në finale

Ka përfunduar ndeshja e dytë gjysmëfinale e Kupës së Shqipërisë mes Teutës së Durrësit dhe Tiranës.

Ashtu siç pritej, nuk pati shumë surpriza, me rekordmenët bardheblu që falë barazimit 0-0, siguruan biletën për në finalen e madhe të 1 qershorit, në Air Albania, përballë Egnatias së Rrogozhinës.

Takimi në stadiumin “Niko Dovana” nisi me Teutën më kërkuese, megjithatë shënjestra e ‘Djemve të detit’ kishte nevojë për kalibrim.

Ndalesat e shpeshta, gjatë pjesës së parë bënë që ky fraksion loje të përfundonte pa shumë episode të veçanta.

Në pjesën e dytë, “muzika” nuk ndryshoi shumë, me Teutën që kërkonte golin e Tiranën që mendonte të shfrytëzonte kundërsulmet për të thelluar rezultatin e përgjithshëm (takimi i parë ka përfunduar 3-0).

Në fund, një barazim që i shërbeu Teutës thjesht për statistikë, me skuadrën e Martinit që largohet nga kompeticioni i dytë kombëtar me kokën lart.

Nga ana tjetër “Gjigandi i Europës Juglindore”, pas kualifikimit për në finale, fillon të mendojë që tani për derbin, në kampionat, përballë Partizanit./m.b /gijotina.com