Alban Bruçi, 25-vjeçari që u bë shënjestër e plumbave një natë më parë në lagjen “Rus” në Shkodër ka deklaruar para policisë se nuk ka asnjë konflikt dhe nuk ka dijeni kush qëndron pas atentatit ndaj tij.
“Nuk e kam idenë se kush mund të jenë autorët e kësaj ngjarjeje. Kam qenë duke shkuar në shtëpi kur dy persona me motoçikletë u afruan dhe qëlluan ndaj meje. Në atë moment u mundova që të shpëtoj dhe eca pak metra me makinë. Pasi u larguan nuk kisha marrë asnjë plumb dhe menjëherë erdha në polici për të treguar ngjarjen. Nuk kam konflikte me persona të tjerë dhe nuk e di se kush mund ta ketë bërë”, mësohet të ketë thënë Bruçi.
Ka dyshime se ndaj 25-vjeçarit është qëlluar me 19 plumba të qitur nga një pistoletë tip Scorpions e cila dyshohet se ka qenë me silenciator pasi nuk janë dëgjuar të shtënat në zonën ku ndodhi atentati.
Disa prej plumbave kanë përfunduar në xhamin e automjetit dhe në derën e makinës por objektivi i këtij atentati ka arritur që të shpëtojë pa u plagosur. Automjeti i tij edhe pasi është qëlluar ka ecur disa metra deri në momentin që është ndalur. Atentatorët janë larguar dhe më pas 25-vjeçari Bruçi ka dalë nga makina duke u larguar me shpejtësi dhe duke bërë denoncimin në polici.
Deri më tani policia nuk ka arritur që të identifikojë autorët ndërsa janë sekuestruar kamerat e sigurisë të subjekteve aty afër për të mësuar dinamikën e ngjarjes dhe për të arritur në identifikimin e autorëve.
Alban Bruçi në vitin 2016 ka plagosur një person afër teatrit “Migjeni” dhe asokohe është arrestuar si i dyshuar për veprën penale “vrasje e mbetur në tentativë”. Policia dyshon se atentati ka ardhur për shkak të disa konflikteve që mund të ketë pasur i riu kohët e fundit edhe pse e mohon një gjë të tillë. Policia vijon hetimet për ta zbardhur të plotë ngjarjen.
Discussion about this post