Nuk kanë të sosur problemet me platformën shtetërore e-Albania, e cila menaxhohet nga Agjencia Kombëtare e Shoqërisë së Informacionit (AKSHI) që drejtohet nga Mirlinda Karçanaj. Qytetarë të shumtë kanë ngritur alarmin për vonesa dhe probleme të mëdha teknike në procesin e regjistrimeve të fëmijëve në shkolla, vetëm pak ditë para nisjes së vitit të ri shkollor. Një nënë e një 6-vjeçari denoncon se, megjithëse ka aplikuar prej kohësh, ende nuk ka marrë përgjigje për pranimin në klasën e parë, ndërsa në të njëjtën shkollë janë edhe 19 fëmijë të tjerë në pritje. Një tjetër qytetar ankohet se prej një jave po përpiqet të regjistrojë fëmijën në gjimnaz përmes platformës, por sistemi rezulton i bllokuar dhe nuk e lejon të kryejë aplikimin.
Denoncimet e shumta tregojnë një kaos të plotë në menaxhimin e regjistrimeve dhe po penalizojnë prindërit, të cilët nuk mund të sigurojnë librat dhe dokumentacionin e nevojshëm për fëmijët. Situata ngre pikëpyetje të mëdha mbi funksionimin e portalit, i cili shpallet si sukses nga qeveria por po dështon në momente kyçe për qytetarët. Prindërit kërkojnë ndërhyrje të menjëhershme nga Ministria e Arsimit dhe institucionet përkatëse për të zgjidhur problemet, përndryshe mijëra nxënës rrezikojnë të mbeten jashtë procesit mësimor që në ditët e para të shkollës.
Konkretisht portali “joq-albania.com” zbulon se disa qytetarë kanë denoncuar përmes redaksisë së tyre shqetësimet që po përjetojnë me regjistrimet në portalin e-Albania, pak ditë para nisjes së vitit të ri shkollor. Ata ngrenë alarmin për vonesa të pajustifikuara dhe probleme teknike që po pengojnë fëmijët e tyre të regjistrohen në shkolla dhe të pajisen me librat e nevojshëm. Denoncimi i parë vjen nga një nënë e një 6-vjeçari që ende nuk ka marrë përgjigje për pranimin në klasën e parë, ndonëse aplikimi është kryer prej kohësh në E-Albania. Ajo thotë se ka shkuar edhe te shkolla por i është thënë se ka shumë të tjerë në pritje edhe pse ditët po kalojnë dhe fëmijët “mbeten në ajër”.
Sipas saj, vetëm në shkollën ku ka aplikuar janë edhe 19 fëmijë të tjerë në të njëjtën situatë, duke ngritur shqetësime serioze për menaxhimin e procesit. Denoncimi i dytë lidhet me regjistrimet në gjimnaz. Një tjetër qytetar shprehet se prej një jave po përpiqet të aplikojë përmes platformës E-Albania, por çdo përpjekje rezulton e pasuksesshme. Këto raste ngrenë pikëpyetje mbi funksionimin e platformës dhe gatishmërinë e institucioneve për të menaxhuar fluksin e aplikimeve në prag të vitit të ri shkollor. Prindërit kërkojnë ndërhyrje të menjëhershme nga Ministria e Arsimit dhe autoritetet përkatëse për të zgjidhur situatën dhe për të mos penalizuar fëmijët.
Denoncimi 1:
Përshëndetje, kam djalin 6 vjeç, e kam regjistruar te e-Albania për në klasën e parë dhe ende nuk na kanë kthyer përgjigje. Kam shkuar dhe pyetur edhe te shkolla dhe më thonë se ka shumë të tjerë në pritje të vendimit. Nuk di çfarë të bëjmë, nuk dimë ku të drejtohemi, s’mund të marrim libra dhe asgjë tjetër, ndërsa ditët kalojnë. Isha pardje të pyesja te shkolla dhe më thanë se ka edhe 19 veta të tjerë në pritje. Nuk di kur do të marrim një përgjigje.
Denoncimi 2:
Përshëndetje, kam një javë që provoj të aplikoj për një gjimnaz në e-Albania dhe më del mesazhi: “Aplikimi nuk mund të kryhet me sukses, provoni përsëri.”
Discussion about this post