Faqja zyrtare e FSHF-së është sulmuar nga hakerat. Lajmi është bërë i ditur nga vetë FSHF-ja në rrjetin social facebook, ku ndër të tjera këtë veprim e akuzon si të paprecedentë dhe se sipas tyre lidhet drejtpërdrejtë me ndërhyrjen flagrante të kryebashkiakut Veliaj. FSHF i bën apel, përgjegjësve për këtë sulm që të tërhiqen duke paralajmëruar pasoja.
“Në një ngjarje të paprecedentë uebi i qeverisë së futbollit është sulmuar në mënyrë agresive nga hakerat dhe mbyllur sot pas publikimit të fakteve tronditëse për ndërhyrjen flagrante të kryetarit të Bashkisë së Tiranës, Erion Veliaj në zgjedhjet e Shoqatës Rajonale të Futbollit Tiranë. Në çastet që po flasim faqja vazhdon të jetë e mbyllur për shkak të këtij sulmi të qartë me prapavijë politike. FSHF dënon këtë sulm skandaloz të politikës dhe i bën thirrje që të tërhiqen sa më parë pasi kjo taktikë mund të ketë pasoja të rënda për cilindo të përfshirë në këtë akt të turpshëm. Pavarësisht këtij sulmi, komuniteti i futbollit shqiptar do të vazhdojë të denoncojë të gjitha ndërhyrjet, sulmet dhe presionet e politikës dhe nuk do të tërhiqet përballë shantazheve dhe kërcënimeve të pushtetit.”, thuhet në njoftimin për shtyp.
Pas deklaratave të ashpra të Erion Veliajt ndaj kreut të FSHF-së Armando Duka, sot Prokuroria e Tiranës ka nisur hetimet këtij të fundit Duka, për akuzën e vjedhjes duke shpërdoruar detyrën. Këto hetime kanë nisur pas referimit nga policia e shtetit, ndërkohë që Duka do të rigarojë për kreun e FSHF-së, në zgjedhjet që do të mbahen në datën 2 Mars.
Discussion about this post