5 nga 10 ekipet e Kategorisë Superiore do duhet t’i zhvillojnë ndeshjet pritëse në ‘Elbasan Arena’.
Stadiumi i Teutës dhe së fundmi edhe ai i Laçit janë në rikonstruktim e sipër dhe si rrjedhojë këto dy skuadra nuk kanë një shtëpi të tyre.
Nga ana tjetër arenat sportive të Partizanit dhe Kukësit që u nisën nga e para nuk kanë mbaruar ndërtimin. Megjithatë Verilindorët pritet që për pak javë të zhvillojnë ndeshje në Kukës, pasi stadiumi të jetë gati.
Dinamo nga ana tjetër ende nuk ka një ambient të vetin ku mund të presë miqtë, duke u detyruar të gjejë hapësira të tjera.
Fakti që ‘Air Albania’ nuk është ende gati për të pritur një ndeshje pas rregullimeve të bëra në tapetin fushës, ka bërë që ekipet në fjalë të kërkojnë për një tjetër ambient dhe duket se mundësia më e mirë ishte Elbasani.
Ekipet në fjalë kishin si mundësi zgjedhjeje edhe stadiumin ‘Loro Boriçi’ në Shkodër, por fakti që ‘Elbasan Arena’ menaxhohet nga FSHF-ja ua ka bërë klubeve të Superligës më të thjeshtë pjesën e procedurave.
Përpos faktit që Elbasani është shumë afër Tiranës dhe pjesa më e madhe e këtyre skuadrave qëndrojnë pikërisht në kryeqytet./Gijotina.com
