Naftëtarët e Ballshit po protestojnë sërish para rafinerisë, ku forcat të shumta policie po i pengojnë të futen brenda gjatë momentit që po bëhet çmontimi i uzinës së naftës.
Të dëshpëruar, naftëtarët thonë se nuk e dinë se kush po e kryen çmontimin dhe kanë kërkuar të zhvillohet një seancë plenare në Kuvend, sa i përket kësaj tematike.
“Është turpi i botës, të punosh 30 vite në rafineri dhe të mos kesh bukë të hash dhe të prishet në këtë formë, është skandaloze. Krahasoje me Maqedoninë e Veriut, të jesh atje naftëtar, ke privilegje ndërsa këtu nuk ke bukë të hash. Çfarë të themi më? Na vjen zor edhe të dalim para gjithë njerëzve. Ne na vjen turp të dalim para fëmijëve, ka burri 500 lekë në xhep? Do ikim jashtë shtetit se s’kemi zgjidhje tjetër. Iku nëntori ne nuk kemi marrë asnjë lekë. U bëj thirrje naftëtarëve të bashkohen dhe të kërkojmë me protesta paqësore atë që na takon se është turp jemi në mes të Europës. Unë do iki në Greqi do vjel ullinj atje se nuk kam zgjidhje tjetër, fëmijët duan bukë“, u shpreh njëri nga naftëtarët.
Ata kërkojnë që Kuvendi të shprehë vullnetin mbi çmontimin e rafinerisë dhe të zbatohet ligji në mënyrë që paratë e fituara të jepen për naftëtarët ashtu siç e parashikon ligji.
Discussion about this post