Gjatë fjalimit të tij ditën e sotme në Moskë, presidenti i Rusisë Vladimir Putin u pyet për operacionin ushtarak në Ukrainë. Ndërkohë që lufta filloi në shkurt dhe po vijon ende, lideri tha se nuk dëshiron të flasë për atë që e cilësoi si zgjerimin e “papranueshëm” të NATO-s, duke shtuar se kishte kërcënime për sigurinë ruse që e shtynë të ndërhynte ushtarakisht në Ukrainë.
Putin zbuloi se ngjarjet në Ukrainë në 2014, kur protestat në rrugë rrëzuan presidentin pro-rus të Ukrainës nga detyra çuan drejtpërdrejt në konfliktin e sotëm.
Ai tha gjithashtu se vazhdimisht mendonte për ushtarët rusë që kanë vdekur në Ukrainë, por tha se Moska nuk kishte zgjidhje tjetër veç agresionit në këtë rast.
“Duhet të vendosnim se çfarë të bënim me Donbasin sepse njerëzit ishin duke jetuar nën zjarr për 8 vjet”, tha ai. “Duhej të njihnim pavarësinë e tyre”.
Presidenti rus tha se kjo nuk mjaftonte, kështu që ai ndërmori “hapin tjetër logjik” për t’i inkorporuar ata në Federatën Ruse, ndërsa nga ana tjetër të gjitha këto pretendime kundërshtohen ashpër nga Ukraina.
Putin tha se konflikti në Ukrainë është një “luftë civile” në një masë të caktuar. Ai e përshkroi Ukrainën si një “shtet artificial”, ndërsa shtoi: Ne kishim vetëm një qëllim, ishte të ndihmonim njerëzit në Donbas. Vetëm Rusia është në gjendje të jetë garantuese e integritetit territorial të Ukrainës”.
Discussion about this post