Presidenti Bajram Begaj ka mbajtur një deklaratë nga Presidenca, në pamundësi për të lexuar mesazhin e tij nga salla e Parlamentit. Roli i Bajram Begajt si President i Republikës u vu në dyshim sot, pasi me qëndrimin e tij për t’iu drejtuar Parlamentit me një mesazh, teksa opozita proteston prej muajsh, u interpretua si një përdorim që po i bëhet atij nga Kryeministri Edi Rama.
Opozita ka vijuar me protestën e saj në sallën e Kuvendit, duke përdorur bilbilat, ndërsa Begaj ndodhej në një nga lozhat teksa priste që Lindita Nikolla ti thërriste emrin dhe ai të shfaqej në podium. Por duket se xhiroja e Begajt nga Presidenca në Kuvend doli një lëvizje boshe, pasi Nikolla njoftoi se Presidentit nuk do i jepej fjala, për shkak të tensioneve. Thjesht Begaj u përdor nga mazhoranca e Kryeministrit Edi Rama, ndoshta për të “identifikuar” opozitën në opinionin publik jo vetëm si bllokuese e seancave normale në Kuvend, por edhe si penguese që Kreu i Shtetit të mbante një fjalim.
Pasi u largua nga Kuvendi, Begaj zgjodhi të lexonte mesazhin e përgatitur nga Presidenca. Ai u shpreh se Kuvendit i duhet opozita dhe se palët duhet të bashkëpunojnë për të mirën e vendit.
Sipas tij, seanca e sotme ishte një mundësi që deputetët të shënonin kthesën për situatën në parlament, ndërsa u bëri thirrje këtyre të fundit se duhet të gjejnë gjuhën e përbashkët pa u penguar nga interesat partiake.
“Për çdo çelje sezoni gjeni mesazhin e presidentit, sot zgjodha të komunikoj drejtpërdrejtë me deputetët për shkak të rrethanave që sollën mbylljen e sesionit të kaluar. Këtë mesazh po e përcjell përmes mediave.
Kjo ishte një mundësi që deputetët të shënonin kthesën për situatën në parlament. Me përgjegjësinë madhore që mban detyra juaj, deputetët duhet të gjejnë gjuhën e përbashkët dhe të krijojnë një atmosferë ku dominon interesi kombëtar dhe dialogu mes palëve.
Pozita dhe opozita duhet të bashkëpunojnë për të mirën e vendit. Kuvendi është vendi ku ka diskutime konstruktive mes palëve dhe është hapësira e debateve ku të gjithë të kenë mundësinë të përfshihen dhe të dëgjohen. Kuvendi ka nevojë për opozitën, argumentet e saj dhe përballjen në debat me argumente.
Bashkëpunimi mes palëve ka mundësinë të çlirojë energjinë pozitive. Aty duhet të kultivohet shpresa për të ardhmen dhe demokracia”, tha Begaj.
Discussion about this post