Nga Lutfi Dervishi
Tragjedia në Maqedoni, ku në orët e para të mëngjesit flakët morën jetën e 59 të rinjve (150 të lënduar) në një diskotekë, nuk duhet të mbetet thjesht një tjetër lajm i zi. Nuk mund të vazhdojmë të përsërisim të njëjtin ritual: vajtime, ngushëllime, arrestime dhe më pas, harresë kolektive deri në tragjedinë e radhës.
Kjo nuk është thjesht një histori maqedonase, është një këmbanë edhe për ne, ku lokalet mbushen përtej kapaciteteve, ku daljet e emergjencës shpesh janë të kyçura, ku inspektimet bëhen vetëm pas tragjedisë dhe ku standardet e sigurisë janë opsionale, jo detyrim.
Nuk mjafton të numërojmë viktimat, të ndezim qirinj dhe të nxjerrim urdhër-arreste që shërbejnë si alibi për sistemin. Ajo që duhet është të kërkojmë standarde, ligje që nuk zbatohen vetëm në letër (maskarada me ligjin e duhanit) dhe një kulturë përgjegjësie e përgjegjshmërie.
Nëse nuk zgjohemi tani, atëherë le të mos habitemi kur lajmi i radhës të mos vijë nga Koçani i Maqedonisë, por nga Tirana, Durrësi, Shkodra apo ndonjë tjetër qytet shqiptar ku siguria trajtohet si luks dhe jo si domosdoshmëri.
Discussion about this post