Interi fitoi 1-0 kundër Liverpool në “Anfield”, por humbja me dy gola në “San Siro” bëri që kampionët në fuqi të eliminoheshin nga Champions League dhe goli i Lautaro Martinez të kishte vlerë vetëm për të personalisht.
Bayern në ndeshjen tjetër mposhti 7-1 Salzburg dhe u kualifikua, duke ua prerë ëndrrën austriakëve që kishin barazuar 1-1 ndeshjen e parë.
LIVERPOOL
Pas gjysmë ore lojë në “Anfield”, Matip goditi traversën dhe trembi italianët, që më pas shpëtuan edhe nga një tentativë e Van Dijk. Tre minuta nga mbyllja e pjesës së parë Calhanoglu vuri në vështirësi Alisson.
Në shtesë Alexander-Arnold bëri me hije Interin me një goditje dënimi, por pjesa e parë përfundoi pa gol. Pjesa e dytë nisi me një shtyllë të Salah, i cili edhe në minutën e 77 u ndal po nga shtylla.
Lautaro Martinez shtangu skuadrën e Liverpool në minutën e 62-të, me një goditje fantastike nga jashtë zone. Një minutë më pas Interi mbeti me një lojtar më pak, pasi Sanchez u ndëshkua me karton të kuq.
Kjo penalizoi Interin, që nuk kishte fuqinë të shënonte golin tjetër e ta çonte ndeshjen në shtesë. Në shtesë Vidal i mohoi golin e barazimit Luis Diaz.
GJERMANËT
Bayern Munich mendoi ta zgjidhte shpejt çështjen e kualifikimit në çerekfinalet e Champions League. Robert Lewandowski shënoi tre gola për 23 minuta, dy me penallti, dhe austriakët e RB Salzburg po përjetonin një makth.
Polaku vendosi edhe rekordin e ri për trigoleshin më të shpejtë nga fillimi i ndeshjes në Champions League, pasi theu rekordin e Marco Simone të vendosur me Milanin në vitin 1996, ndaj Rosenborg, kur shënonte tre gola për 24 minuta.
Gnabry në pjesën e parë shënoi edhe një tjetër gol, kurse më pas skenën e mori edhe Thomas Muller. Në minutën e 70-të Salzburg realizoi golin e nderit me anë të Kjaergaard. Bayern nuk u ndal, pasi Muller dhe Sane realizuan edhe dy gola të tjerë.
Discussion about this post