Deputeti i Partisë Demokratike, Xhelal Mziu, i cili nuk ka marrë pjesë ditën e sotme në “Foltoren” e Berishës në Dibër, zonë ku ai është zgjedhur deputet, me anë të një statusi në facebook i bën thirrje SPAK që të ndëshkojë personat e përfshirë, në masakrën zgjedhore në Dibër.
Ai thotë se faktet e dorëzuara nga PD u vërtetuan dhe nga raporti i OSBE-OHDIR, por edhe SPAK një pjesë të saj e ka zbardhur duke gjetur si fajtor Dionis Xholin dhe Albjon Çejkun për korrupsion në Zgjedhje.
“Partia Demokratike ka depozituar në Komisionin Qendror të Zgjedhjeve, në SPAK dhe në prokuroritë e rretheve, mijëra informacione, fakte, dokumente që provojnë se si regjimi po zbatonte një projekt kriminal të deformimit të vullnetit të qytetarëve përmes vjedhjes më të madhe në historinë e zgjedhjeve.
Kjo masakër kundër vullnetit të lirë u konfirmua edhe nga raporti i OSBE/ODIHR, ndërsa një copëz e vogël e asaj që ka ndodhur në 25 prill, u zbardh edhe nga SPAK, i cili gjeti fajtor Denis Xholin, përgjegjës i zyrës juridike në Bashkinë Bulqizë, dhe Albjon Çejku për korrupsion në zgjedhje dhe përdorim të funksionit publik për veprimtari zgjedhore” – shkruan Xhelal Mziu.
Ai më tej kujton se të gjithë i kanë parë makinat që u shpërndanin para qytetarëve dhe për këtë kërkon nga drejtësia që të vërë në bankën e të akuzuarve arkitektët e këtij sistemi kriminal.
“Të gjithë i mbajnë mend makinat që shpërndanin paratë, që ky pushtet u kishte vjedhur qytetarëve përgjatë 8 viteve të fundit, për të blerë varfërinë e prodhuar nga keqqeverisja e Ramës. Ndaj, ne inkurajojmë drejtësinë të mos ndalet te ekzekutorët, por të marrë në bankën e të akuzuarve arkitektët e këtij sistemi kriminal, që me vullnet politik, pengoi ndryshimin që qytetarët kërkonin dhe e kërkojnë edhe sot” – është shprehur Mziu.
Kujtojmë që Partia Demokratike ka ngritur dhe një Komision Hetimor për atë që selia blu e quan masakra zgjedhore e 25 prillit.
