Ministrja për Rininë dhe Fëmijët, Bora Muzhaqi ka reaguar pas deklaratës së saj të habitshme, pasi u pyet nga gazetarët për ngjarjen makabre në Fier.
Ajo kërkon ndjesë për keqkuptimin ditën e sotme dhe se ndihet e prekur si të gjithë nga tragjedia e Fierit.
“Ndjesë nëse kam lënë shteg për keqkuptimin e kujtdoqoftë që ka pritur një përgjigje tjetër nga unë, përballë disa mediave të cilat m’u gjendën përballë duke shkuar për një tjetër takim pune.
Jam thellësisht e prekur si të gjithë nga tragjedia e Fierit dhe besoj se gjithçka mund të bëhet më tutje për adresimin e çështjeve të pyetjes, do të bëhet, ashtu si duhet, nga institucionet. Detyra ime funksionale është angazhimi me programet jashtëshkollore të nxënësve e studentëve, si dhe programet e aktiviteteve për fëmijët në komunitet. Prandaj dhe nuk m’u duk e udhës të jap një opinion personal mbi fusha të tjera specifike për të cilat m’u drejtua pyetja.
Ndërsa për sa i takon sarkazmës politike apo mediatike me tragjedinë, nuk kam asnjë koment. E kam neveritur gjithnjë lojën publike me dhimbjen e shkaktuar prej tragjedive. Por sot e provova shijen e saj drejtpërdrejtë. Vdekja e dhunshme e një fëmije nuk mund të jetë kurrë arsye për të luajtur me njeri-tjetrin. Ndjesë edhe njëherë atyre që kanë keqkuptuar përgjigjen time” – është shprehur Muzhaqi.
Kujtojmë se ditën e sotme, Muzhaqi e pyetur nga gazetarët lidhur me ngjarjen makabre të vrasjes së 8-vjeçarit, nga Klodian Çalamani ka refuzuar të japë shpjegime dhe të justifikoj postin e saj. Gjithçka ka thënë Muzhaqi është fjalia “Nuk kam kohë”, duke iu shmangur insistimit të gazetarëve për ngjarjen që shokoi opinion publik.
Për deklaratën e ministres, ka reaguar edhe Partia Demokratike e cila ka kërkuar dorëheqjen e Muzhaqit.
Discussion about this post