Nuk ndalen sulmet me armë në Serbi, 8 viktima dhe 13 të plagosur

Një tjetër masakër ka ndodhur të enjten vonë në mbrëmje pranë qytetit të Mlladenovac, rreth 60 kilometra në jug të kryeqytetit Beograd.

Tetë persona kanë ndërruar jetë dhe 13 janë plagosur si pasojë e një sulmi me armë.

Sipas disa mediave lokale, sulmuesi filloi të qëllonte mbi njerëz me një armë automatike, pas një debati me një oficer të policisë, në një park në fshatin Dubona.

Instituti për Transfuzion të Gjakut në Serbi i tha Radios Evropa e Lirë se Ministria e Shëndetësisë u ka bërë thirrje qytetarëve që të dhurojnë gjak.

Forcat e xhandarmërisë me armë të gjata dhe patrulla të shumta policore janë në terren.

Ministrja e Shëndetësisë e Serbisë, Danica Grujiçiç, dhe shefi i Shërbimit të Zbulimit, Aleksandar Vulin, raportohet se kanë udhëtuar në zonë.

Këto janë të shtënat e dyta masive që ndodhën në Serbi këtë javë.

Të mërkurën, një djalë 13 vjeç vrau tetë nxënës dhe një rojë të sigurisë në një shkollë në qendër të Beogradit.

Sulmi bëri që Qeveria e Serbisë të propozojë kufizime më të ashpra për posedimin e armëve.

Të shtënat masive janë relativisht të rralla në Serbi, por zotërimi i armëve në vend është ndër më të lartit në Evropë.