Kreu i Bashkisë Tiranë ka vendosur që deri në fund të mandatit ta zhdukë “Parkun e Liqenit Artificial”, megjithëse premtimi elektoral ishte ndryshe. Kështu, çdo vit sipërfaqja e betonit shtohet, ndërsa ajo e gjelbër pakësohet.
Veliaj premtoi se do të zgjerojë hapësirën e gjelbër në Parkun e Liqenit Artificial. “Shtojmë 5.5 ha gjelbërim te Parku i Liqenit. Lajm i mirë për frymëmarrjen e Tiranës! Projekti fantastik për hyrjen te Liqeni i shton hapësirat e gjelbra parkut, duke ua kthyer qytetarëve edhe zonën e ish Gardes së Republikës”, është shprehur kryebashkiaku.
Por lali Eri nuk di ku ta çojë betonin. Së fundmi, njoftoi tenderin me miliona lekë për punime në park: “Ndërtimi i Rrugëve të Brendëshme në PMLAT”. Këto punime i kërkon Agjencia e Parqeve dhe Rekreacionit, institucion i varur nga Bashkia Tiranë
Tenderi
Për këtë prokurim Veliaj ka vendosur 160 milionë lekë. Në dokumentet e publikuara tregohet se kanë paraqitur ofertë bashkimi i kompanive ASI-2A CO” Sh.p.k. dhe “2Z Konstruksion”, gjithashtu bashkimi i operatorëve “G&P ” Sh.p.k. dhe “L.T.E CONSTRUTICION”. Ofertën e parë Veliaj e ka përjashtuar me argumentin se nuk ka dorëzuar dokumentet që të tregojnë se pronarë apo aksionarë të kompanisë nuk kanë të ngarkuar ndonjë vepër penale.
Shumë herë Veliaj ka lidhur kontrata me pronarë që janë arrestuar apo ndëshkuar për mashtrim me TVSH apo abuzime me tenderët. Këtë herë Lali Eri është treguar rigoroz për këtë pikë të ligjit. Dëshmitë e penalitetit janë online dhe bashkia mund ta kishte bërë vetë kontrollin, ose mnund t’ia kërkonte operatorit ta plotësonte këtë kërkesë. Në fakt, e gjithë kjo është bërë për t’i hapur rrugë ofertuesve të tjerë “ G&P ” Sh.p.k. dhe “L.T.E. CONSTRUTICION”. Kjo e fundit e administruar nga Artur Caushaj, i cili ka dhe pjesën më të madhe të aksioneve. Për mungesë të konkurrencës dhe mundësisë për korrupsion, tenderi është shënuar me “flamur të kuq” nga vëzhguesi Open Data.
Pazaret me Veliajn
Caushaj është mjaft i njohur për tenderët pa garë që përfiton nga qeveria dhe sidomos nga Bashkia Tiranë. Pak muaj më parë Gijotina.com denoncoi se si Artur Caushaj ishte një nga fituesit e tenderit “Ndërtim rrjet ujësjellësi në zonën e Autostradës Tiranë -Durrës “me vlerë 261 334 752,00 milionë lekë, të nënshkruar nga vetë “Lali Eri”. Gjithashtu, në qershor të vitit 2021 kompania L.T.E Construction sh.p.k. mori 26 milionë lekë për instalime në burimin e ujësjellësit Tiranë. Përveç faktit se Veliaj i dha kësaj kompanie miliona lekë për 3 muaj punë, nga dokumentet evidentohet se tenderi është dhënë pa garë.
Ndërkohë, në mars të 2020, Caushaj rrëmbeu prokurimin me objekt “Ndërtim rrjet ujësjellësi ne Rr.’Xhorxhi Martini’, ‘Jeronim De Rada’, ‘Myrteza Këlliçi’” , me një fond prej 100 milionë lekësh. Dy muaj më vonë Veliaj i dha Caushajt edhe tenderin me objekt “Ndërtim stacione monitorimi uji në 38 pika në qytetin e Tiranës”, që i kushtoi qytetarëve të Tiranës, 46 milionë lekë. Ashtu si edhe në të parin, edhe në këtë tender garuesit e tjerë janë skualifikuar. Kompania e drejtuar nga Artur Caushaj ka fituar në dy vitet e fundit, disa tenderë me një shifër totale prej 610 milionë lekësh.
Betonizimi që shtohet në vite
Agjencia e Parqeve dhe Rekreacionit në Bashkinë Tiranë ka deklaruar disa herë në përgjigje për mediat apo në rregullore për ndërtimet se “në Parkun e Liqenit Artificial lejohen vetëm ndërhyrje që synojnë konservimin dhe ristrukturimin e objekteve dhe hapësirave aktuale, pa kryer shtesa në volume”. Mbrojtja e vetme që gëzon statusi është ajo e kufijve që janë pjesë e Planit Vendor. Por, tenderi më sipër flet për ndërtim rrugësh të tjera të brendshme në park, çka do të thotë që do të jetë shtesë në volum të betonit.
Pamje nga parku në 2012
Pamje nga parku në 2022:
Kështu, hapësira e gjelbër nuk po shtohet, por pakësohet çdo ditë. Madje, Bashkia Tiranë miratoi Planin e Detajuar Vendor të zonës TR/169 ku parashikohet një sipërfaqe ndërtimi prej 102,979 m2 , ndërsa hapësira publike e të gjithë zonës pritet të jetë vetëm 17,577 metër katror. Kjo hapësirë, është shumë më e vogël se 2.5 hektarët që kryebashkiaku Veliaj premtoi disa vjet më parë se do t’i ktheheshin në administrim APR-së për t’i bërë pjesë të parkut kombëtar. Këto fakte tregojnë që deklarata e Veliajt e cituar në fillim të artikullit ka qenë vetëm një gënjeshtër, ndërsa parku po degradohet gjithmonë e më shumë nga duart e kryebashkiakut.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post