Rusia duket se nuk ka ndërmend të ndal luftën, përkundrazi po gjen mënyra që të mund të nënshtrojë sa më shumë vendeve. Ajo duket se ka pikasur dhe kë në shënjestër se të gjitha shtetet që janë kundër saj. Së fundmi në një deklaratë për mediat zëdhënësi i Kremlinit, Dmitry Peskov, ka paralajmëruar vendet e tjera të Bashkimit Evropian se mund t’iu ndërpresë furnizimet me gaz natyror rus nëse refuzojnë të paguajnë në rubla.
Komentet e tij erdhën pasi Rusia ndaloi furnizimet me gaz për Poloninë dhe Bullgarinë, një lëvizje që liderët evropianë e denoncuan si “shantazh”. Sipas mediave të huaja mësohet se gjigandi rus i kontrolluar nga shteti, Gazprom, tha se po i ndërpret gazin natyror Polonisë dhe Bullgarisë sepse ata refuzuan të paguanin në rubla ruse, në përputhje me një dekret të lëshuar muajin e kaluar nga Presidenti Vladimir Putin. Gazprom tha se nuk kishte marrë asnjë pagesë të tillë që nga fillimi i muajit.
“Rusia ishte dhe mbetet një furnizues i besueshëm i burimeve të energjisë për konsumatorët e saj dhe mbetet e përkushtuar ndaj detyrimeve të saj kontraktuale. Kur të afrohen afatet e pagesës, nëse disa konsumatorë refuzojnë të paguajnë sipas sistemit të ri, atëherë sigurisht që do të zbatohet dekreti i presidentit”, tha Peskov.
Nga ana tjetër i pyetur nëse Rusia ishte gati për humbjet buxhetore që mund të përballonte nëse vendet evropiane refuzonin të paguanin për gazin në rubla, Peskov u përgjigj: Gjithçka është llogaritur, janë parashikuar të gjitha rreziqet dhe janë marrë masat e nevojshme.
Discussion about this post