Ledian Sharka, 38-vjeçar humbi jetën mëngjesin e djeshëm, ndërsa dyshohet për një arrest kardiak. “Nuk ndihem mirë”, ishin fjalët e fundit të shqiptarit, i cili humbi jetën pak momente më pas.
Ngjarja ka ndodhur në Castel Del Monte, një komunë me 421 banorë në provincën e L’Aquila.
I ndjeri ishte i martuar dhe baba i një vajze 5-vjeçare. Sipas informacioneve paraprake, shqiptari, banues në Castel Del Monte, së bashku me një koleg, ishte i angazhuar në punimin e tullave në një shtëpi private, kur shfaqi probleme të papritura shëndetësore. I shoqëruar nga kolegu i tij, 38-vjeçari shkoi në farmacinë e qytetit dhe ndërsa shkëmbente disa fjalë me farmacistin për të shpjeguar arsyen e pranisë së tij, u shemb përtokë.
Urgjenca shkoi me një helikopter në vendngjarje, por nuk mund të bëhej asgjë për punëtorin. Pas një kohe të shkurtër, karabinierët nga stacioni lokal mbërritën në vend të drejtuar nga toger Massimo Gentile për të kryer hetimet e nevojshme. Prokurori në detyrë, Fabio Picuti, ka urdhëruar transferimin e trupit në morgun e spitalit, ku me shumë gjasa do të kryhet autopsia për të verifikuar lidhjen e mundshme mes vdekjes së punëtorit dhe punës që ai po kryente.
Ndërkohë, Karabinierët e Inspektoratit të Punës nuk kanë konstatuar parregullsi kontraktuale të punëtorit në një kompani të vogël me seli në Castel Del Monte, e menaxhuar nga një sipërmarrës po ashtu nga Shqipëria.
Kryetari i bashkisë së Castel Del Monte, Matteo Pastorelli, tha se ishte “thellësisht i pikëlluar nga vdekja e papritur e 38-vjeçarit, e cila la pas një grua dhe një vajzë 5-vjeçare, të cilët kanë jetuar këtu prej vitesh, të njohur dhe të respektuar nga e gjithë popullata, citon Ilmessaggero.
Një punëtor gjithmonë i vëmendshëm dhe ndihmës – shtoi ai – që vendosi, falë punës ndërtimore që ofrohet në këtë tokë, të banojë pikërisht këtu, duke dhënë një sinjal të rëndësishëm në drejtim të shpopullimit të zonave të brendshme dhe rrjedhimisht të ndikimit ekonomik për të gjithë komunitetin”.
Discussion about this post