Ecuri fantastike për belgët e Meshelen! Besnik Hasi ka arritur në një kohë të shkurtër të ndryshojë për mirë situatën te skuadra e tij, ekip ku u emërua trajner në ditët e para të nëntorit të vitit të kaluar dhe tashmë është një nga pretendentet, për të siguruar një vend, në fazën e grupeve, të UEFA Champions League, sezonin e ardhshëm.
Skuadra e Hasit fitoi 2-3 në transfertë kundër Cercle Bryzh, suksesi i tretë radhazi në Jupiler Pro League.
Tekniku 52-vjeçar po bën një punë fantastike, teksa ekipin e mori në vendet e fundit të tabelës, ndërkohë që po e afron gjithnjë e më shumë me “play-off”-et e titullit kampion.
Meshelen nuk ka humbur ende në 2024, vit gjatë së cilit numëron 6 fitore dhe 2 barazime. Një ecuri e jashtëzakonshme, ku merita të padiskutueshme ka edhe Hasi, teksa kujtojmë se trajneri shqiptar ka një përvojë të madhe, teksa ka drejtuar më parë edhe skuadrën e Anderlecht në Belgjikë, ekip të cilin e udhëhoqi drejt fitimit të titullit dhe Superkupës në vitin 2014.
Vlen të theksohet fakti se Hasi debutoi me skuadrën e tij të re më 11 nëntor të vitit 2023 me fitore ndaj Çarleroit. Që nga ai moment, tekniku shqiptar ka regjistruar plot 9 fitore në kampionat si dhe 3 humbje dhe 3 barazime.
Discussion about this post