Një shqiptar 38-vjeçar, banues në Trieste, është denoncuar nga Policia e Shtetit italian për veprën penale të përvetësimit të padrejtë, pasi nuk kishte paguar kontratën e leasing-ut për një Maserati Ghibli GT me vlerë mbi 90 mijë euro.
Operacioni u zhvillua nga agjentët e Komisariatit Polo-San Sabba, të cilët pas një hetimi disa-javor arritën të lokalizonin makinën luksoze të fshehur në një rrugë të mbyllur të qytetit.
Sipas raportit të policisë, hetimi filloi pas një denoncimi të bërë nga kompania pronare e automjetit, pasi 38-vjeçari nuk kishte respektuar detyrimet kontraktuale dhe kishte krijuar një borxh prej rreth 50 mijë euro.
Pavarësisht njoftimeve dhe kërkesave të përsëritura për kthimin e mjetit, ai refuzoi ta dorëzonte, duke e mbajtur pa asnjë të drejtë ligjore.
Duke marrë parasysh rrezikun që automjeti, duke qenë në zonën kufitare të Triestes, të mund të transportohej jashtë Italisë, Prokuroria e Triestes lëshoi më 9 tetor 2025 një urdhër sekuestrimi dhe rikthimi të menjëhershëm të automjetit, bashkë me çelësat dhe dokumentet e qarkullimit.
Pas kërkimeve të vazhdueshme, më 17 tetor, agjentët lokalizuan Maseratin, e cila ishte parkur në një zonë të izoluar dhe e fshehur pas automjeteve të tjera.
Gjatë ndërhyrjes, policia gjeti edhe çelësat e makinës, dokumentet dhe disa aksesorë me logon e Maserati-t.
Automjeti u ç’sekuestrua dhe iu kthye përfaqësuesit të kompanisë pronare, me urdhër të Prokurorit të çështjes.
Ndërkohë, 38-vjeçari është denoncuar për përvetësim të padrejtë, ndërsa procedura gjyqësore ndodhet ende në fazën paraprake.
gijotina.com/
Discussion about this post