Gjykata e Tiranës ka dhënë sot masën e arrestit me burg për 2 efektivët të cilat kanë qenë të pranishëm në momentin kur komisariati i Kamzës u përfshi nga flakët dhe ku gjeti vdekjen 26-vjeçari Arben Mici, i ndaluar për dhunë në familje.
Po ashtu mbeti i plagosur edhe shtetasi Dilaver Idrizi, edhe ky i dënuar ndërsa mes të plagosurve është efektivi Hajredin Boja.
Ky i fundit së bashku me efektivin tjetër Fatmir Isufi akuzohen për shpërdorim detyre.
Për policinë, zjarri dyshohet të jetë vendosur fillimisht nga Arben Mici, në bashkëpunim me Dilaver Idrizin, me qëllim arratisjen nga paraburgimi. Ata ndodheshin në qeli të ndara ngjitur me njëra-tjetrën por kjo nuk i ka penguar të thurin planin, ndërsa situata u doli nga kontrolli kur flakët u përhapen me shpejtësi.
Në këtë moment efektivi Hajredin Boja ka vrapuar dhe ka hapur derën dhe ka tentuar të nxjerrë Micin nga qelia, por 26-vjeçari i ka shpëtuar nga duart dhe është futur në tualetin e dhomës. Më pas kanë mbërritur edhe punonjës të tjerë, por për shkak të tymit dhe flakëve, ndërhyrja ka qenë e pamundur.
Forcat zjarrfikëse kanë gjetur të mbyllur 26-vjeçarin në tualet në gjendje të rëndë, të asfiksuar dhe me plagë në trup, i cili ndërroi jetë më pas në spital.
Për zbardhjen e kësaj ngjarjeje, janë duke punuar policia, prokuroria, zjarrfikësit dhe Agjencia e Mbikëqyrjes Policore.
Discussion about this post