Maqedonia e Veriut pritet të shpall gjendjen emergjente për krizën energjetike gjatë javës së ardhshme, sipas një njoftimi të Ministrisë së Ekonomisë.
Sipas drejtorit të MEPSO-s, operatorit të shpërndarjes, Kushtrim Ramadani ky vendim do të lehtësojë procedurat për importimin e energjisë elektrike.
Ramadani theksoi se Maqedonia e Veriut është një vend i varur nga importi i energjisë elektrike, gjë e cila përforcohet akoma më shumë me krizën energjitike që ka prekur shumë vende të botës.
Maqedonia e Veriut importon energji elektrike nga Bullgaria, Serbia, Bosnja dhe Kosova, teksa çmimet mbeten shumë të larta, ndaj kostoja e përballimit të këtyre çmimeve në bursë është shpallja e gjendjes emergjente, sipas Ramadanit.
“Tani çmimet nëpër bursat botërore janë shumë të larta. Ne zakonisht importojmë prej Bulgarisë, Serbisë, Bosnjës, Kosovës ndonjëherë mirëpo ne thirremi zakonisht në bursën e Bullgarisë e cila është referente për ne ku çmimet janë shumë të larta. Por nëse duam që të mos ketë kufizime në shfrytëzimin e energjisë elektrike, duhet ta paguajmë këtë çmim”, thotë Kushtrim Ramadani, drejtor i MEPSO-s.
Ramadani theksoi se shkak për prodhimin e ulët vendas të energjisë elektrike është keqmenaxhimi i hidrocentraleve dhe termocentralëve. Infrastruktura e vjetër dhe mungesa e qymyrit për termocentralet janë shkaqet që çojnë në prodhimim e vetëm 10 për qind të kapaciteteve.
Maqedonia e Verit është e pajisur me dy termocentrale, atë në Manastir dhe Osllomej të cilat janë funksional prej 40 vitesh.Mungesa e thëngillit bën që këto dy termocentrale të mos shfrytëzohen në maksimumin e tyre.
Sipas Ramadanit, rezervat që vendi ka janë me kualitet të dobët, si pasojë dhe prodhimi do të jetë në masë të vogël.Hidrocentralet nuk mun të prodhojnë shumë për shkak të kushteve klimatike dhe keq menaxhimit të tyre, ndaj kjo sjell para një sezon të dimrit me rezerva tejet të ulëta në hidrocentrale dhe rënie të prodhimtarisë edhe nga energjia e ujit.
Qeveria e Maqedonisë së Veriut ka siguruar se deri në fund të këtij viti nuk do të ketë ndërprerje të energjisë ose rritje të çmimit, teksa shpallja zyrtare e gjendjes së jashtëzakonshme pritet të shpallet të martën, në mbledhjen e rradhës së qeverisë.
Discussion about this post