Humbjet e njëpasnjëshme të Kombëtares së Kilit janë duke e larguar atë gjithnjë e më shumë nga Botërori ‘Qatar 2022’.
Përfaqësuesja në fjalë është tashmë plot 6 pikë larg vendit të pestë që është mundësia e fundit e kalimit në Play-off, për hyrë pastaj në fazën e finaleve.
Pas humbjes ndaj Kolumbisë me rezultatin 3-1 Arturo Vidal ia ka hedhur fajin ngarkesës së madhe dhe datave shumë të afërta të ndeshjeve.
Protagonisti i fitoreve të mëdha të viteve “të arta”, pra 2015-2016 dhe ende strumbullar i një ekipi kombëtar në një fazë rënieje, komenton pas humbjes: “Këtu në Barranquilla, Kolumbia bëhet e fortë, është një ferr të luash. Unë mendoj se të luash 3 ndeshje në 8 ditë është një vrasje. Është një torturë. Nuk e di sa orë fluturim bëmë, vajtje-ardhje. Por tani le të mendojmë për përgatitjen e angazhimeve të radhës”.
Pavarësisht kësaj ai nuk do jetë pjesë e ndeshjes së ardhshme të Kilit kundër Perusë për shkak të numrit të kartonëve që ka marrë./Gijotina.com
