Nuk u pranuan nga familja/ Çifti “i dashuruar” rikthehet në Elbasan, futen në shkollë riedukimi

Ka marrë fund aventura e arratisjes së dy adoleshentëve nga qyteti i Elbasanit të cilët u arratisën nga shtëpi pasi familjarët nuk ishin dakord me lidhjen e tyre të dashurisë.

Të rinjtë janë gjetur gjatë natës së mbrëmshme në Tiranë nga policia e kryeqytetit pas informacioneve të përcjella nga policia e Elbasanit. Dy adoleshentët janë rikthyer në Elbasan dhe janë sistemuar në një qendër riedukimi.

Sipas policisë, dy të rinjtë kanë pohuar se janë larguar nga shtëpia për shkak të historisë së tyre të dashurisë pasi kishin bindjen se nuk do të pranoheshin nga familjarët.

Djali i përket komunitetit rom, dhe përveç moshës shumë të vogël, familja e vajzës ka qenë kundër lidhjes së tyre edhe prej këtij fakti. Ata kishin kursyer disa para në mënyrë që të largoheshin nga familjet, por pas denoncimit në polici ka përfunduar aventura e tyre.