Zgjedhjen e kryesisë së re të Partisë Socialiste dhe anëtarëve të saj, jo të gjithë e kanë pritur mirë. Një prej tyre është edhe kryetari i Bashkisë Lezhë, Pjerin Ndreu, i cili ishte dhe një prej kandidatëve të përzgjedhur për të qenë anëtarë i kryesisë, por që mos sigurimi i votave bëri që të mos të jetë pjesë e kryesisë së PS. Këtë gjë me sa duket nuk e priti mirë dhe zgjodhi që të reagonte përmes një statusi në fb, ku falënderonte 166 anëtarët që e votuan dhe thoshte se kjo nuk ishte ambicia e tij por e dëshira e kryeministrit që e ka përzgjedhur dhe se për këtë arsye nuk loboi që të mblidhte vota.
“Një falënderim dhe sqarim! Faleminderit 166 anëtareve të Asamblesë Socialiste që votuan për mua për anëtar kryesie, megjithëse nuk kam bere asnjë përpjekje për të lobuar për vota! Mirënjohje Kryeministrit për nxjerrjen e emrit tim, megjithëse unë nuk dija asgjë se do isha kandidat! Në fund nuk kalova numrin e duhur për të qenë në kryesi! Të qenit anëtar kryesie nuk ka qenë asnjëherë ambicie për mua dhe as se kam menduar. Detyra që kam është parësore dhe tejkalon çdo ambicie tjetër. Angazhimi im është i fokusuar në kryerjen me korrektesë e përkushtim të detyrës së Kryetarit të Bashkisë Lezhë, dhënien e shërbimit të qytetarëve me standarde të larta, dhe ndryshim i realitetit të zymte te asaj zone turistike që duhet çuar para me çdo çmim!” – shkruhej në postimit e Ndreut.
Por, këtë status, kryetari i Bashkisë Lezhë e ka fshirë dhe ka bërë një tjetër ku shkruan se arsyeja që e ka hequr është se shumica nuk lexojnë asgjë, duke e shoqëruar dhe me dy emoji që qeshin.
“U detyrova me e heq statusin sepse shumica nuk lexojnë asgjë”- shton Ndreu në postimin e radhës.
Vërtet kjo do ketë qenë arsyeja që ka bërë këtë veprim, apo e ka detyruar dikush kreun e Bashkisë Lezhë që ta fshij postimin?
