Në një postim në rrjetet sociale, mjeku i njohur Ilir Allkja, i cili ishte kandidat për anëtar i Këshillit Kombëtar të PD, por nuk fitoi, ka reaguar duke hedhur dyshime mbi procesin. Mjeku shkruan se pavarësisht se shumë delegatë e siguruan për mbështetjen dhe votën që do i jepnin, në fund, nuk u zgjodh të jetë pjesë e anëtarëve të këshillit. Allkja shkruan se delegatët me të drejtë vote dhe numëruesit kanë qenë njerëz pa kontribute, madje kishin punuar kundër interesit të opozitës.
“Uroj mos jetë hipokrizi! Kuvendi kombëtar i PD më kujtoi një rrëfim të profesorit të ndjerë të anatomisë patologjike Pëllumb Bitrit. Profesor Bitri doktoraturën e kish mbrojtur në Moskë. Pas prishjes së marrëdhënieve me Rusinë, komiteti qendror i partisë punës (sot PS) i kishte rrëzuar gjithë titujt shkencorë të mbrojtur atje. Kohë më vonë tek sa po mbronte titullin para një komisioni me mjekë shqiptar, aspak kopetentë në fushën e anatomopatologjisë, disa anëtarë të komisionit e kishin uruar, përqafuar, dhe …. votuar kundër ! Në kuvendin e datës 30 prill, në ambjentet e Pallatit Kongreseve, më kontaktuan pafundësisht delegatë, të cilët më përgëzuan, uruan e madje më premtuan votën, pa jua kërkuar. Në fakt rezultoi se unë nuk isha në listën fituese të këshillit kombëtar të PD, dhe nuk e vuaj aspak këtë. Nuk po arrij të kuptoj nëse më gënjyen dhe përse duhej ta bënin, ndërsa kjo puna e numërimit të votave është ç’shenjtëruar me kohë, e duhen dekada të marrë nderin e humbur. Ndoshta betejat e mia publike, për fjalën e lirë nuk i bindën dot as delegatët e ndoshta as numëruesit. Bindës për votuesit e numëruesit kanë qenë plot njerëz pa profil publik, pa kontribute, e madje edhe nga ata që kanë punuar kundër interesit të opozitës e madje kanë bashkëpunuar me Ramën. Urime fituesve!” – shkruan Allkja në facebook.
Discussion about this post